- 15 రోజుల్లో ఐదుగురు పోలీసులపై చర్యలు
- ఇల్లీగల్ వ్యవహారాలు, రాజకీయ జోక్యాలు కారణంగా చర్యలు
- పేకాట స్థావరంపై దాడిలో ఖాకీల చేతివాటం ఆరోపణలు
- రాజకీయ వివాదంలో సీఐ బలై, ఇల్లీగల్ ఎఫైర్ ఆరోపణలపై ఎస్సై చర్యలు
జోగుళాంబ గద్వాల్ జిల్లాలో ఖాకీల వరుస వివాదాలు సంచలనం రేపుతున్నాయి. కేవలం 15 రోజుల్లో ఐదుగురు పోలీసులపై చర్యలు తీసుకోవడం పోలీసు శాఖను కలవరపెడుతోంది. ఇల్లీగల్ వ్యవహారాలు, రాజకీయ జోక్యాలు కారణంగా సీఐ, ఎస్సైలపై నిషేధాలు, బదిలీలు జరగడం జిల్లాలో హాట్ టాపిక్ అవుతోంది. పేకాట స్థావరాల్లో ఖాకీల చేతివాటం, వివాహేతర సంబంధాల ఆరోపణలు సంచలనంగా మారాయి.
జోగుళాంబ గద్వాల్ జిల్లాలో వరుస పోలీసు వ్యవహారాలు కలకలం రేపుతున్నాయి. కేవలం 15 రోజుల్లో ఐదుగురు పోలీసు సిబ్బందిపై తీసుకున్న చర్యలు ఇప్పుడు పోలీసు శాఖను ఉలిక్కిపడేలా చేస్తున్నాయి. అనవసర రాజకీయ జోక్యాలు, ఇల్లీగల్ కార్యకలాపాలు కారణంగా ఈ చర్యలు తీసుకోవడం పోలీసులు ఎప్పుడు ఏ దెబ్బ ముంచుకొస్తుందోనని ఆందోళన చెందుతున్నారని తెలుస్తోంది.
పేకాట స్థావరంపై దాడి:
ఉండవల్లి సమీపంలో పేకాట స్థావరంపై పోలీసులు దాడి చేసినప్పుడు, స్వాధీనం చేసుకున్న నగదులో కొంత చూపించలేదనే ఆరోపణలు వినిపించాయి. ఈ ఘటనపై రహస్యంగా నిర్వహించిన అంతర్గత విచారణ అనంతరం, స్పెషల్ బ్రాంచ్ సీఐ జములప్ప, ఎస్సైలు విక్రం, శ్రీనివాసులపై చర్యలు తీసుకున్నారు.
రాజకీయ వివాదంలో సీఐ బలై:
సీఐ భీమ్ కుమార్, గద్వాల్ జిల్లాలో మంత్రి జూపల్లి కృష్ణారావును అడ్డుకోవడంలో నిర్లక్ష్యంగా వ్యవహరించారని, ఆయనపై చర్యలు తీసుకున్నారు. ఈ ఘటన రాజకీయంగా పెద్ద చర్చకు దారితీసింది.
ఇల్లీగల్ ఎఫైర్ ఆరోపణలు:
అలంపూర్ పీఎస్ లో ఎస్సై నాగరాజుపై వచ్చిన వివాహేతర సంబంధాల ఆరోపణలు, జిల్లా ఎస్పీకి ఫిర్యాదు చేయడంతో ఆయనపై కూడా చర్యలు తీసుకుని మహబూబ్ నగర్ వీఆర్ కు బదిలీ చేశారు.
ఈ మొత్తం వ్యవహారాలు జిల్లాలో పోలీసులు మరియు ప్రజల మధ్య గందరగోళాన్ని తెచ్చాయి. ఖాకీల చర్యలు జిల్లాలోనే కాకుండా ఉమ్మడి పాలమూరు జిల్లాలో సంచలనంగా మారాయి.
