ప్రేమ వ్యవహారంలో మనస్తాపం: యువకుడి ఆత్మహత్యాయత్నం, ఆసుపత్రిలో మృతి

పోలీసులు అందించిన వివరాల ప్రకారం, శ్రీకాంత్ భైంసా పట్టణంలోని ఒక మొబైల్ షాపులో పనిచేస్తున్నాడు. కొన్ని నెలలుగా ఒక యువతిని ప్రేమిస్తున్నట్లు కుటుంబ సభ్యులకు చెప్పి, ఆమెను వివాహం చేసుకుంటానని తెలిపాడు. అయితే, అతని తండ్రి విదేశాల్లో ఉండటంతో, ఆయన వచ్చాక మాట్లాడతామని కుటుంబ సభ్యులు సమాధానం చెప్పినట్లు సమాచారం.

ఈ పరిణామాలతో మనస్తాపానికి గురైన శ్రీకాంత్, బుధవారం సాయంత్రం గుర్తు తెలియని టాబ్లెట్లు తీసుకున్నట్లు తెలుస్తోంది. కుటుంబ సభ్యులకు ఫోన్ ద్వారా సమాచారం అందిన వెంటనే, అతన్ని నిజామాబాద్‌లోని ఒక ప్రైవేటు ఆసుపత్రికి తరలించారు.

వైద్యుల సూచన మేరకు అతనికి మెరుగైన చికిత్స అందించినప్పటికీ, గురువారం ఉదయం శ్రీకాంత్ మృతి చెందాడు. మృతుడి తల్లి బోడిగొల్ల లక్ష్మి ఇచ్చిన ఫిర్యాదు మేరకు, భైంసా పట్టణం పోలీసులు కేసు నమోదు చేసుకుని దర్యాప్తు చేస్తున్నట్లు తెలిపారు.