న్యూఢిల్లీ, 2026-06-05
దేశంలో మహిళలకు కనీస భద్రత కరువైందని, ప్రతీ 18 నిమిషాలకు ఒక అత్యాచారం (రేప్) కేసు నమోదవుతోందని జాతీయ నేర గణాంక విభాగం (ఎన్సీఆర్బీ) 2024 నివేదిక కీలక విషయాలను వెల్లడించింది. మహిళలపై లైంగిక దాడుల్లో బీజేపీ పాలిత రాష్ట్రాలే టాప్-5 స్థానాల్లో నిలవడం గమనార్హం.
దేశంలో మహిళలకు కనీస భద్రత కరువైందని, ప్రతీ 18 నిమిషాలకు ఒక అత్యాచారం (రేప్) కేసు నమోదవుతోందని జాతీయ నేర గణాంక విభాగం (ఎన్సీఆర్బీ) 2024 నివేదిక కీలక విషయాలను వెల్లడించింది. బేటీ బచావో.. బేటీ పడావో వంటి నినాదాలు చేస్తున్నప్పటికీ, మహిళలపై లైంగిక దాడుల్లో బీజేపీ పాలిత రాష్ట్రాలే టాప్-5 స్థానాల్లో నిలవడం గమనార్హం. దేశవ్యాప్తంగా సగటున రోజుకు 1,210 మంది మహిళలపై వివిధ రకాల నేరాలు చోటు చేసుకుంటున్నాయని ఈ నివేదిక స్పష్టం చేసింది.
మహిళలకు భద్రత కల్పించడంలో సవాళ్లు
మహిళలు గౌరవించబడే చోట దేవతలు నివసిస్తారని ఒక నానుడి. అయితే, ప్రస్తుత గణాంకాల ప్రకారం దేశంలో మహిళలకు రక్షణ కల్పించడంలో సవాళ్లు ఎదురవుతున్నాయని తెలుస్తోంది. 2024 ఒక్క ఏడాదిలోనే దేశవ్యాప్తంగా 4,41,534 మంది మహిళలపై దాడులు, అఘాయిత్యాలు జరిగాయి. వీటిలో భర్త, అత్తింటివారి వేధింపులు, కిడ్నాప్లు, పోక్సో కేసులు, లైంగిక వేధింపులు, అత్యాచారాలు వంటివి ప్రధానంగా ఉన్నాయి.
నేరాల్లో బీజేపీ పాలిత రాష్ట్రాలదే అగ్రస్థానం
మహిళలపై నేరాల గణాంకాల్లో బీజేపీ పాలిత రాష్ట్రాలు టాప్-3 స్థానాల్లో నిలవడం గమనార్హం. 66,396 కేసులతో ఉత్తరప్రదేశ్ అగ్రస్థానంలో ఉండగా, 47,954 కేసులతో మహారాష్ట్ర రెండో స్థానంలో, 36,536 కేసులతో రాజస్థాన్ మూడో స్థానంలో నిలిచాయి. మహిళలపై నేరాల్లో హత్యలు, లైంగిక దాడులు, లైంగిక వేధింపులు, కిడ్నాప్లు, గృహహింస, వరకట్న వేధింపులు తదితరాలు ప్రధానంగా ఉన్నాయి.
అత్యాచార కేసుల్లోనూ బీజేపీ రాష్ట్రాలే ముందు
దేశంలో 2024 ఏడాదిలో మొత్తంగా 29,536 అత్యాచార కేసులు నమోదయ్యాయి. మహిళలపై లైంగిక దాడుల్లో బీజేపీ పాలిత రాష్ట్రాలే టాప్-5 స్థానాల్లో ఉన్నాయి. రాజస్థాన్లో అత్యధికంగా 4,871 అత్యాచార కేసులు నమోదుకాగా, తర్వాతి స్థానాల్లో వరుసగా ఉత్తరప్రదేశ్ (3,209), మహారాష్ట్ర (3,091), మధ్యప్రదేశ్ (3,061), హర్యానా (1,391) ఉన్నాయి. ఈ గణాంకాలు దేశంలో మహిళల భద్రతపై తీవ్ర ఆందోళనలను రేకెత్తిస్తున్నాయి.
లైంగిక దాడుల్లో తెలిసినవారే ఎక్కువ
మహిళలపై జరిగే లైంగిక దాడుల్లో 97 శాతం కేసుల్లో నిందితులు బాధితులకు తెలిసినవారే ఉంటున్నారని జాతీయ నేర గణాంక విభాగం (ఎన్సీఆర్బీ) నివేదిక తెలిపింది. 2024లో నమోదైన మొత్తం 29,536 అత్యాచార కేసుల్లో 28,597 కేసుల్లోని నిందితులు బాధితురాళ్లకు తెలిసినవారుగా ఉన్నట్టు వెల్లడించింది. ఘాతుకానికి పాల్పడిన వారిలో 2,134 కేసుల్లో కుటుంబసభ్యులు, 13,879 కేసుల్లో స్నేహితులు, మాజీ భర్తలు, 12,584 కేసుల్లో ఫ్యామిలీ ఫ్రెండ్స్, ఇరుగుపొరుగు, సహోద్యోగులు ఉన్నట్టు తెలిసింది.
