🔹 మహారాష్ట్రలో సిబిల్ స్కోరు కారణంగా పెళ్లి రద్దు
🔹 వరుడి రుణ భారం తెలుసుకున్న వధువు కుటుంబ సభ్యులు పెళ్లికి నిరాకరణ
🔹 సిబిల్ స్కోరు ఏంటి? ఇది ఎందుకు ముఖ్యమైంది?
మహారాష్ట్రలోని ముర్తిజాపూర్ పట్టణంలో సిబిల్ స్కోరు కారణంగా పెళ్లి రద్దైన ఘటన చర్చనీయాంశంగా మారింది. వధువు మేనమామ వరుడి క్రెడిట్ స్కోర్ చెక్ చేయగా, అతడు అనేక రుణాలు తీసుకున్నట్టు, తక్కువ స్కోర్ ఉన్నట్టు తేలింది. దీంతో వధువు కుటుంబం పెళ్లిని రద్దు చేసింది. సిబిల్ స్కోరు రుణాల ప్రక్రియలో ఎంత కీలకమో ఈ సంఘటన స్పష్టంగా చూపించింది.
మహారాష్ట్ర, ఫిబ్రవరి 08:
పెళ్లికి ముందు వరుడి బ్యాంకు రికార్డులు చెక్ చేసి పెళ్లిని రద్దు చేసిన ఘటన మహారాష్ట్రలో సంచలనంగా మారింది. ముర్తిజాపూర్ ప్రాంతానికి చెందిన ఓ యువతి, అదే ప్రాంతానికి చెందిన యువకుడికి పెద్దలు వివాహ నిశ్చయించారు. అన్ని ఏర్పాట్లు పూర్తయిన అనంతరం వధువు మేనమామ వరుడి క్రెడిట్ హిస్టరీ తెలుసుకోవాలని నిర్ణయించారు.
సిబిల్ స్కోరు పరిశీలన తర్వాత వరుడు అనేక బ్యాంకుల నుంచి రుణాలు తీసుకుని వాటిని సకాలంలో తీర్చలేదని తేలింది. దాంతోపాటు అతని సిబిల్ స్కోరు కూడా చాలా తక్కువగా ఉందని గుర్తించడంతో, ఈ విషయం వధువు కుటుంబ సభ్యులకు తెలియజేశారు. ఆర్థికంగా నిలదొక్కుకోలేని వ్యక్తిని కూతురికి ఇచ్చి ఇబ్బందులు ఎదుర్కొకూడదని భావించిన కుటుంబం పెళ్లిని రద్దు చేసుకుంది.
సిబిల్ స్కోరు అంటే ఏమిటి?
సిబిల్ (CIBIL – Credit Information Bureau India Limited) స్కోరు అనేది వ్యక్తుల ఆర్థిక నడవడికను సూచించే ఒక రేటింగ్. బ్యాంకులు లేదా ఆర్థిక సంస్థలు రుణాల మంజూరుకు ముందు ఈ స్కోరును పరిశీలిస్తాయి. అధిక స్కోరు ఉన్నవారికి రుణం త్వరగా మంజూరవుతుంది, తక్కువ స్కోరు ఉన్నవారికి రుణాలపై అడ్డంకులు ఏర్పడతాయి.
ఈ సంఘటన ద్వారా కేవలం వ్యక్తిత్వం, కుటుంబ నేపథ్యం కాకుండా ఆర్థిక స్థితిగతులను కూడా పెళ్లికి ముందు పరిశీలించాల్సిన అవసరం ఎంత కీలకమైందో నిరూపితమైంది.
