ఇసుక బకాసురులకు పోలీసుల అండ

• ఇసుక అక్రమ రవాణాదారులపై పోలీసు శాఖలో చర్చ
• 11 పోలీసు అధికారులపై ఆరోపణలు
• డీజీపీ ఆదేశాల మేరకు చర్యలు తీసుకోవాలి

ఇసుక అక్రమ రవాణా ప్రోత్సహిస్తున్న పోలీసు అధికారుల పై ఆరోపణలు తీవ్రంగా మారాయి. 11 మంది అధికారుల జాబితా రూపొందించబడినది. అందులో 9 మంది ఎస్సైలు, 2 మంది సీఐలు ఉన్నారు. డీజీపీ ఆదేశాలతో బదిలీలు, శాఖాపరమైన చర్యలు చేపట్టాలని సూచనలు వచ్చినా, ఇప్పటివరకు సత్వర చర్యలు తీసుకోలేదు.

ఇసుక అక్రమ రవాణాదారుల నుంచి మామూళ్ల వసూలు అంశం పోలీసు శాఖలో తీవ్రమైన చర్చకు దారితీసింది. ఇటీవల విడుదలైన మెమోలో పలువురు పోలీసు అధికారుల పేర్లు, వివరాలతో కూడిన జాబితా అందించారు. కమిషనరేట్ పరిధిలో 11 మంది పోలీసు అధికారులపై ఇసుక అక్రమ రవాణా ప్రోత్సహిస్తున్నారని బలంగా ఆరోపణలు ఉన్నాయి. వీరిలో 9 మంది ఎస్సైలు, 2 మంది సీఐలు ఉన్నారు.

డీజీపీ కార్యాలయం నుండి ఈ అధికారులను బదిలీ చేయాలని మరియు శాఖాపరమైన చర్యలు తీసుకోవాలని ఆదేశాలు వచ్చాయి. బోధన్ రూరల్ ఎస్సైగా పనిచేసి ప్రస్తుతం బాల్కొండ నియోజకవర్గంలో ఉన్న అధికారికి లంగ్డాపూర్, హంగర్గ ప్రాంతాల నుంచి నెలకు రూ.8 లక్షల వరకు మామూళ్లు అందుతున్నట్లు మెమోలో పేర్కొన్నారు.

అయితే, ఇప్పటివరకు ఈ అధికారుల పై ఎలాంటి చర్యలు తీసుకోకపోవడం గమనార్హం. అలాగే, రుద్రూర్ సర్కిల్‌లో పనిచేస్తున్న మరొక ఎస్సై అర్ధరాత్రుల్లో ఇసుక ట్రాక్టర్లు, లారీలకు కాపలా ఉండి అక్రమ రవాణాను ప్రోత్సహిస్తున్నట్లు ప్రచారంలో ఉంది. ఈ పరిస్థితులు, ఎస్సైలపై బలమైన ఆరోపణలతో కూడిన వివరణలు, తక్షణ చర్యలు అవసరమని సూచిస్తున్నాయి.