రైతు భరోసా: నిధుల విడుదలపై కొత్త మార్గదర్శకాలు.. అర్హులెవరంటే?

రాష్ట్ర ప్రభుత్వం 'రైతు భరోసా' పథకం కింద పెట్టుబడి సాయాన్ని ఈ నెల 30న విడుదల చేయడానికి ఏర్పాట్లు చేస్తోంది. గతంలోలా కాకుండా, ఈసారి ఒకే విడతలో నిధులు రైతుల ఖాతాల్లో జమ చేయాలని ప్రభుత్వం నిర్ణయించినట్లు సమాచారం. దాదాపు రూ. 9 వేల కోట్ల వరకు నిధులు విడుదల చేయనున్నట్లు అంచనా వేస్తున్నారు.

ఈ పథకం ద్వారా సుమారు 73 లక్షల మంది రైతులు లబ్ధి పొందే అవకాశం ఉంది. అయితే, అర్హుల ఎంపిక ప్రక్రియలో ప్రభుత్వం కీలక మార్పులు చేయనున్నట్లు తెలుస్తోంది. గతంలో రెండు ఎకరాల వరకు మాత్రమే సాయం అందించడంతో రైతుల నుంచి విమర్శలు వచ్చాయి. ఈ నేపథ్యంలో, ఈసారి చిన్న, సన్నకారు రైతులకు ప్రాధాన్యత ఇవ్వాలని ప్రభుత్వం యోచిస్తున్నట్లు సమాచారం. ఏడున్నర ఎకరాలలోపు భూమి కలిగిన రైతులకు మాత్రమే సాయం అందించే ప్రతిపాదనపై చర్చ జరుగుతోంది.

పథకం అమలులో శాటిలైట్ సర్వేను కీలక సాధనంగా ఉపయోగించుకోవాలని ప్రభుత్వం నిర్ణయించింది. రాష్ట్రవ్యాప్తంగా పంటల సాగు వివరాలను శాటిలైట్ చిత్రాల ద్వారా సేకరించిన ప్రభుత్వం, గ్రామాల వారీగా పంట విస్తీర్ణాన్ని గుర్తించింది. ఈ సర్వే నివేదిక ఆధారంగా అర్హులైన రైతుల జాబితాను ఖరారు చేయనున్నట్లు తెలుస్తోంది. దీనివల్ల వాస్తవంగా పంట సాగు చేస్తున్న వారికే లబ్ధి చేకూరుతుందని ప్రభుత్వం భావిస్తోంది.

ఒకే విడతలో నిధులు విడుదల చేయాలనే ప్రభుత్వ నిర్ణయం రైతుల్లో కొంత ఆనందాన్ని నింపినప్పటికీ, శాటిలైట్ సర్వే ఆధారంగా అర్హుల జాబితాను ఖరారు చేయడంపై సర్వత్రా ఆసక్తి నెలకొంది. ఈ ప్రక్రియ ద్వారా పథకం పారదర్శకంగా అమలు అవుతుందని, అర్హులైన ప్రతి రైతుకు లబ్ధి అందుతుందని ప్రభుత్వం ఆశిస్తోంది.