నిర్మల్ జిల్లా బాసర శ్రీ జ్ఞాన సరస్వతి అమ్మవారి ఆలయంలో భారీ చోరీ జరిగింది. అమ్మవారి ప్రధాన ఆలయం వెనుక ఉన్న మహంకాళి ఆలయంలో గుర్తు తెలియని దుండగులు తాళాలు పగులగొట్టి చోరీకి పాల్పడ్డారు. ఈ ఘటన కలకలం రేపింది.
దుండగులు మహంకాళి ఆలయంలోకి చొరబడి, తాళాలు పగులగొట్టి లోపలికి ప్రవేశించారు. చోరీ జరిగిన విషయం తెలియగానే ఆలయ అధికారులు, స్థానిక పోలీసులు సంఘటనా స్థలానికి చేరుకున్నారు.
సమాచారం అందుకున్న వెంటనే ముధోల్ ఎమ్మెల్యే పవార్ రామారావు పటేల్, సబ్ కలెక్టర్ సంకేత్ కుమార్ ఆలయాన్ని సందర్శించి, ఘటనాస్థలాన్ని పరిశీలించారు. ఆలయ అధికారులతో పాటు పోలీసు అధికారులతో చర్చించి, చోరీకి సంబంధించిన పూర్తి వివరాలను అడిగి తెలుసుకున్నారు.
ఈ సందర్భంగా ఎమ్మెల్యే పవార్ రామారావు పటేల్ మాట్లాడుతూ, ఆలయాల భద్రత విషయంలో మరింత అప్రమత్తంగా ఉండాలని అధికారులకు సూచించారు. భద్రతా చర్యలను పటిష్టం చేయాలని, చోరీకి పాల్పడిన నిందితులను త్వరగా గుర్తించి, చట్టపరమైన చర్యలు తీసుకోవాలని పోలీసులను ఆదేశించారు.
అదే సమయంలో, బాసర మండల కేంద్రంలో ఎస్ఐఆర్-2026 అవగాహన కార్యక్రమంలో భాగంగా నిర్వహించిన 2కే రన్లో ఎమ్మెల్యే, సబ్ కలెక్టర్ పాల్గొన్నారు. ఓటరు జాబితా సవరణ, కొత్త ఓటర్ల నమోదు, ఓటు హక్కు ప్రాధాన్యతపై అవగాహన కల్పించడం ఈ కార్యక్రమ లక్ష్యం.
