మిర్యాలగూడ, 2023-09-01
ప్రభుత్వం పేదలకు అందించే ప్రజా పంపిణీ వ్యవస్థ (పిడిఎస్) బియ్యాన్ని అక్రమంగా కొనుగోలు చేసి, నిల్వ చేసి, రవాణా చేస్తున్న ముగ్గురిని మిర్యాలగూడ రూరల్ పోలీసులు అరెస్టు చేశారు. వీరి వద్ద నుంచి 18 క్వింటాళ్ల బియ్యం, రవాణాకు ఉపయోగించిన వాహనాన్ని స్వాధీనం చేసుకున్నారు.
మిర్యాలగూడ రూరల్ పోలీస్ స్టేషన్ పరిధిలోని వెంకటాద్రిపాలెం గ్రామపంచాయతీ పరిధిలోని కేశవనగర్ లోని శ్రీ మారుతీ ట్రేడర్స్, శ్రీరామ బిన్నీ రైస్ మిల్ వద్ద అక్రమంగా పిడిఎస్ బియ్యం రవాణా చేసి నిల్వ చేస్తున్నట్లు అందిన సమాచారంతో మంగళవారం ఆకస్మికంగా తనిఖీలు నిర్వహించారు. రైస్ మిల్ వద్ద కుంచకూరి వెంకటేశ్వర్లు, మేళ్లచెరువు వెంకటరమణ, షేక్ మదార్ లను అరెస్టు చేశారు. మినీ అశోక్ లేలాండ్ వాహనం (టీఎస్ 07 యుఎల్ 3085)లో సుమారు 36 బస్తాల పిడిఎస్ బియ్యం, మొత్తం 18 క్వింటాళ్లు ఉన్నట్లు గుర్తించారు. పంచుల సమక్షంలో పిడిఎస్ బియ్యంతో పాటు వాహనాన్ని స్వాధీనం చేసుకున్నట్లు రూరల్ ఎస్ఐ ఎం. లక్ష్మయ్య తెలిపారు.
అక్రమ వ్యాపార తీరు
ప్రాథమిక దర్యాప్తులో కుంచకూరి వెంకటేశ్వర్లు చుట్టుపక్కల గ్రామాల్లోని తెల్ల రేషన్ కార్డుదారుల వద్ద నుండి పిడిఎస్ బియ్యాన్ని తక్కువ ధరకు కొనుగోలు చేసి, తన రైస్ మిల్లుకు తరలించి, పాలిష్ చేయించి, ఇతర బస్తాల్లో ప్యాకింగ్ చేసి మార్కెట్లో విక్రయిస్తూ అక్రమ లాభం పొందుతున్నట్లు గుర్తించారు. వెంకటరమణ గుమాస్తాగా పిడిఎస్ బియ్యం సేకరణ, రవాణాలో సహకరిస్తుండగా, మదర్ డ్రైవర్గా వాహనం ద్వారా పిడిఎస్ బియ్యాన్ని రైస్ మిల్లుకు తరలిస్తున్నట్లు దర్యాప్తులో వెల్లడైందని తెలిపారు.
అదేవిధంగా, దర్యాప్తులో భాగంగా 2, 3వ నిందితుల వద్ద ఉన్న మొబైల్ ఫోన్లను తదుపరి దర్యాప్తు నిమిత్తం స్వాధీనం చేసుకున్నామని తెలిపారు. ప్రభుత్వం పేద ప్రజలకు ప్రజా పంపిణీ వ్యవస్థ (పిడిఎస్) ద్వారా అందిస్తున్న బియ్యాన్ని అక్రమంగా కొనుగోలు చేయడం, నిల్వ చేయడం, రవాణా చేయడం లేదా దుర్వినియోగం చేయడం వంటి చర్యలకు పాల్పడే వారిపై చట్ట ప్రకారం కఠిన చర్యలు తీసుకుంటామని పోలీసులు తెలిపారు.
