ముధోల్ మండలం ఎడ్బిడ్ గ్రామానికి చెందిన రాజారం రవి (26) అనే 108 అంబులెన్స్ డ్రైవర్, రోడ్డు ప్రమాదంలో తీవ్రంగా గాయపడి, చికిత్స పొందుతూ అర్ధరాత్రి మృతి చెందాడు. ఈ ఘటన ముధోల్ మండలంలో విషాదాన్ని నింపింది.
పోలీసులు, స్థానికుల వివరాల ప్రకారం, మృతుడు రాజారం రవి బాసర గ్రామంలో 108 అంబులెన్స్ డ్రైవర్గా పనిచేస్తున్నాడు. మే 31వ తేదీ రాత్రి విధులను ముగించుకొని మోటార్ సైకిల్పై స్వగ్రామానికి తిరిగి వెళ్తుండగా ఈ ప్రమాదం జరిగింది.
అబ్దుల్లాపూర్ గ్రామంలోని అంబేద్కర్ విగ్రహం సమీపంలో, అతివేగం, అజాగ్రత్తగా వాహనం నడపడంతో రవి నడుపుతున్న మోటార్ సైకిల్ అదుపుతప్పి ఎదురుగా ఉన్న ఇంటి ప్రహారీ గోడను బలంగా ఢీకొట్టింది. ఈ ప్రమాదంలో రవికి తీవ్ర గాయాలయ్యాయి.
వెంటనే స్పందించిన స్థానికులు, రవిని 108 అంబులెన్స్ ద్వారా బైంసా ప్రభుత్వ ఆసుపత్రికి తరలించారు. అక్కడ చికిత్స పొందుతున్నప్పటికీ, జూన్ 1వ తేదీ అర్ధరాత్రి 1:32 గంటల సమయంలో రవి మృతి చెందినట్లు వైద్యులు నిర్ధారించారు.
ఈ ప్రమాదంపై పోలీసులు కేసు నమోదు చేసి దర్యాప్తు చేస్తున్నారు. మృతుడి కుటుంబ సభ్యులు, గ్రామస్థులు తీవ్ర దుఃఖంలో ఉన్నారు.
