🔹 గురువు లాల్యానాయక్ కానిస్టేబుల్‌గా పని చేసే పోలీస్‌ స్టేషన్‌కే అతని శిష్యురాలు జబీనాబేగం ఎస్సైగా వచ్చి బాధ్యతలు స్వీకరించడం
🔹 పేదరికాన్ని అధిగమించి ఇద్దరూ పోటీ పరీక్షల్లో విజయం సాధించడం
🔹 లాల్యానాయక్ ప్రోత్సాహంతో జబీనాబేగం ఎస్సైగా ఎదగడం
🔹 మొయినాబాద్ పోలీస్‌ స్టేషన్‌ ఎదుట లాల్యానాయక్ తన శిష్యురాలను సెల్యూట్ చేసి స్వాగతం పలికిన హృదయానికి హత్తుకునే క్షణం
గురువు ఆశీర్వాదంతో శిష్యురాలి విజయగాధ
రంగారెడ్డి జిల్లా మొయినాబాద్ పోలీస్‌ స్టేషన్‌లో ఒక అరుదైన సంఘటన చోటుచేసుకుంది. ఒకప్పటి లెక్చరర్‌ & ప్రస్తుత కానిస్టేబుల్ లాల్యానాయక్, తన శిష్యురాలు జబీనాబేగం ఎస్సైగా బాధ్యతలు స్వీకరించేందుకు వచ్చినప్పుడు ఆమెను గౌరవప్రదంగా సెల్యూట్ చేయడం అందరికీ ముచ్చటగా మారింది.
పేద కుటుంబానికి చెందిన లాల్యానాయక్, ఎన్నో కష్టాలను అధిగమించి 2020లో కానిస్టేబుల్‌గా ఎంపికయ్యారు. కానిస్టేబుల్ కావడానికి ముందు, ఆయన ఓ జూనియర్‌ కళాశాలలో లెక్చరర్‌గా పనిచేశారు. అదే సమయంలో జబీనాబేగం అనే నిరుపేద విద్యార్థిని ఆయన విద్యాభ్యాసాన్ని ప్రోత్సహించారు. తల్లిదండ్రులు ఆమెకు ఇంటర్ చదువుతున్నప్పుడే వివాహం చేయాలని ప్రయత్నించగా, లాల్యానాయక్ వారితో మాట్లాడి ఆ వివాహాన్ని రద్దు చేయించారు.
జబీనాబేగం 2024లో ఎస్సై పరీక్షల్లో ఉత్తీర్ణురాలై, ట్రైనింగ్ పూర్తి చేసుకుని మొయినాబాద్ పోలీస్‌ స్టేషన్‌లో ఎస్సైగా (ప్రొబేషన్) పోస్టింగ్ పొందారు. ఆమె బాధ్యతలు స్వీకరించేందుకు వచ్చినప్పుడు, ఆమె గురువు లాల్యానాయక్, స్టేషన్‌ ప్రధాన ద్వారం వద్ద నిలబడి సెల్యూట్ చేసి స్వాగతం పలికారు. ఈ సంఘటన అక్కడ ఉన్నవారందరినీ కదిలించింది.
