ఆదిలాబాద్, జూలై 18
ఆదిలాబాద్ జిల్లాలో పోలీసు-ప్రజల అనుబంధాన్ని బలోపేతం చేసేందుకు 'పోలీసులు మీకోసం' కార్యక్రమం నిర్వహించారు. సోనాల మండలం గుర్రాల తాండలో జరిగిన ఈ కార్యక్రమంలో జిల్లా ఎస్పీ అఖిల్ మహాజన్ ముఖ్య అతిథిగా హాజరై, 20 సీసీటీవీ కెమెరాలను ప్రారంభించారు. గ్రామ భద్రతలో ప్రజల భాగస్వామ్యం అత్యంత కీలకమని ఆయన ఈ సందర్భంగా నొక్కి చెప్పారు.
గ్రామాల్లో పోలీసు-ప్రజల అనుబంధాన్ని బలోపేతం చేయడం, నేరాల నియంత్రణలో ప్రజల భాగస్వామ్యాన్ని పెంచే లక్ష్యంతో జిల్లా పోలీసు శాఖ నిర్వహిస్తున్న 'పోలీసులు మీకోసం' కార్యక్రమం శనివారం సోనాల మండలం గుర్రాల తాండలో జరిగింది. జిల్లా ఎస్పీ అఖిల్ మహాజన్ ఐపీఎస్ ముఖ్య అతిథిగా హాజరై గ్రామంలో ఏర్పాటు చేసిన 20 సీసీటీవీ కెమెరాలను ప్రారంభించారు.
ఈ సందర్భంగా ఎస్పీ మాట్లాడుతూ.. ప్రతి గ్రామం సీసీటీవీ నిఘాలో ఉంటే నేరాల నియంత్రణ మరింత సమర్థవంతంగా జరుగుతుందని చెప్పారు. గ్రామ భద్రత అందరి బాధ్యత అని, ప్రజలు పోలీసులకు సహకరించాలని కోరారు. గంజాయి, ఇతర మాదకద్రవ్యాల వల్ల కలిగే అనర్థాలపై అవగాహన కల్పించిన ఆయన.. గంజాయి సాగు, నిల్వ, రవాణా, విక్రయం, వినియోగం చట్టరీత్యా నేరమని హెచ్చరించారు. గంజాయి సాగు చేసే వారికి ప్రభుత్వ సంక్షేమ పథకాలు నిలిపివేయాలని సంబంధిత శాఖలకు సిఫార్సు చేస్తామని తెలిపారు. మాదకద్రవ్యాల నిర్మూలనలో ప్రజలు కీలక పాత్ర పోషించాలని పిలుపునిచ్చారు.
రోడ్డు ప్రమాదాల నివారణకు ట్రాఫిక్ నిబంధనలు తప్పనిసరిగా పాటించాలని సూచించిన ఎస్పీ.. 20 మంది ద్విచక్ర వాహనదారులకు హెల్మెట్లు పంపిణీ చేశారు. అతివేగం, మద్యం సేవించి వాహనాలు నడపడం, ట్రిపుల్ రైడింగ్కు దూరంగా ఉండాలని సూచించారు.
విద్యార్థులు చదువుతో పాటు క్రీడల్లోనూ రాణించాలని, బాల్య వివాహాలను నిరోధించాలని పేర్కొన్నారు. సరిహద్దు గ్రామం కావడంతో పశువుల దొంగతనాలు, అనుమానాస్పద వ్యక్తుల సంచారంపై అప్రమత్తంగా ఉండాలని గ్రామస్తులకు సూచించారు.
అనంతరం రెండు రోజుల పాటు నిర్వహించిన మండల స్థాయి వాలీబాల్ టోర్నమెంట్ విజేతలకు నగదు బహుమతులు, ట్రోఫీలు, మెడల్స్ అందజేశారు. జీడిపల్లి జట్టు ప్రథమ, బోథ్-ఏ జట్టు ద్వితీయ, బోథ్-బీ జట్టు తృతీయ స్థానాల్లో నిలిచాయి. కార్యక్రమంలో ఆదిలాబాద్ డీఎస్పీ ఎల్. జీవన్ రెడ్డి, బోథ్ సీఐ డి. గురుస్వామి, ఎస్ఐ వి. పురుషోత్తం, ప్రజాప్రతినిధులు, గ్రామ పెద్దలు, మహిళలు, యువతతో పాటు సుమారు 500 మంది గ్రామస్తులు పాల్గొన్నారు.
