శ్రీకాకుళం జిల్లా అమదాలవలస మండలంలో ఘటన – పోలీసుల విచారణలో బయటపడ్డ షాకింగ్ నిజాలు
- వివాహేతర సంబంధం కారణంగా భర్త హత్యకు కుట్ర
- భార్య ఈశ్వరమ్మ, ప్రియుడు బాలమురళీకృష్ణ, మరో 8 మంది కలిసి హత్య
- నిందితుల్లో 15 ఏళ్ల మైనర్ కూడా ఉన్నట్లు పోలీసులు వెల్లడింపు
- హత్యకు ముందు మూడు రోజుల పాటు రేకీ చేసిన నిందితులు
- స్థానికుల సమాచారంతో నిందితులని పట్టుకున్న పోలీసులు
శ్రీకాకుళం జిల్లా అమదాలవలస మండలం బొబ్బిలిపేటలో వైసీపీ నేత చంద్రయ్య హత్య కేసులో షాకింగ్ నిజాలు వెలుగు చూశాయి. భార్య ఈశ్వరమ్మ వివాహేతర సంబంధం కారణంగా ప్రియుడు బాలమురళీకృష్ణతో కలిసి హత్యకు కుట్ర పన్నింది. మొత్తం 10 మంది నిందితులను పోలీసులు అదుపులోకి తీసుకున్నారు. హత్యను రాజకీయ కోణంలో పరిశీలించిన పోలీసులు చివరకు కుటుంబ వివాదమే కారణమని నిర్ధారించారు.
శ్రీకాకుళం జిల్లా అమదాలవలస మండలం బొబ్బిలిపేటలో గత నెల 25న జరిగిన వైసీపీ నాయకుడు గురుగుబిల్లి చంద్రయ్య హత్య కేసును పోలీసులు చేధించారు. ఈ కేసులో అతని భార్య ఈశ్వరమ్మ (32), ఆమె ప్రియుడు చింతాడ బాలమురళీకృష్ణ (35) ప్రధాన సూత్రధారులుగా ఉన్నట్లు పోలీసులు తేల్చారు. హత్యకు మొత్తం 10 మంది నిందితులుగా పోలీసులు గుర్తించారు, వీరిలో 15 ఏళ్ల మైనర్ కూడా ఉన్నాడు.
చంద్రయ్య తన భార్య వివాహేతర సంబంధాన్ని గమనించి పలుమార్లు నిలదీయడంతో, ఇద్దరూ కలిసి అతనిని హత్య చేయాలని ప్లాన్ చేశారు. బాలమురళీకృష్ణ తన సహచరుడు అరవింద్ సహాయంతో ఓ ముఠాను ఏర్పాటు చేశాడు. ముఠాలోని వ్యక్తులు మూడు రోజుల పాటు చంద్రయ్య మీద రేకీ నిర్వహించి, చివరకు మార్గమధ్యలో దాడి చేసి అతనిని హత్య చేశారు.
ఈ కేసును పోలీసులు ప్రాథమికంగా రాజకీయ హత్యగా భావించారు. అయితే, హత్యకు ముందు బైక్‌పై కదులుతూ మద్యం సేవించిన అనుమానాస్పద వ్యక్తులపై దృష్టి పెట్టి విచారణ చేపట్టగా, భార్య కుట్రలో పాత్ర ఉన్నట్లు తెలిసింది. హత్యలో ఉపయోగించిన కారు, మూడు ద్విచక్ర వాహనాలను పోలీసులు స్వాధీనం చేసుకున్నారు. నిందితులను కోర్టులో హాజరుపరిచారు.
