జిల్లా కలెక్టర్ భవేశ్ మిశ్రా బుధవారం నిర్మల్ కలెక్టరేట్ సమావేశ మందిరంలో వివిధ రాజకీయ పార్టీల ప్రతినిధులతో సమావేశమై, ఓటరు జాబితా ప్రత్యేక సవరణ ప్రక్రియ (ఎస్ఐఆర్)ను పూర్తి పారదర్శకంగా నిర్వహిస్తామని హామీ ఇచ్చారు. అర్హులైన ఓటర్లు ఎవరూ ఓటు హక్కు కోల్పోకుండా చర్యలు తీసుకోవాలని అధికారులను ఆదేశించారు.
జిల్లాలో చేపట్టనున్న ఎస్ఐఆర్ ప్రక్రియపై రాజకీయ పార్టీల ప్రతినిధులకు కలెక్టర్ సమగ్రంగా వివరించారు. ఓటర్లు తమ నమోదు ఫారాలను ఎన్నికల సంఘం వెబ్సైట్ ద్వారా ఆన్లైన్లో కూడా సమర్పించే అవకాశం ఉందని తెలిపారు. వివరాల పరిశీలన అనంతరం జూలై 31న ముసాయిదా ఓటరు జాబితాను ప్రచురించనున్నట్లు వెల్లడించారు.
ముసాయిదా జాబితాలో తమ పేర్లు లేని ఓటర్లు, సరైన ఆధారాలతో సంబంధిత ఫారాలను నింపి, ధ్రువీకరణ పత్రంతో ఎన్నికల నమోదు అధికారులను సంప్రదించవచ్చని కలెక్టర్ సూచించారు. ఫారం 6, 7, 8ల వినియోగంపై కూడా ఆయన వివరణ ఇచ్చారు.
ఎస్ఐఆర్ ప్రక్రియ సజావుగా సాగేందుకు ప్రతి గుర్తింపు పొందిన రాజకీయ పార్టీ తమ తరఫున బూత్ స్థాయి ఏజెంట్లను నియమించాలని కలెక్టర్ కోరారు. బూత్ స్థాయి అధికారులు, ఏజెంట్లతో నిరంతరం సమావేశాలు నిర్వహించి, ప్రక్రియ విజయవంతానికి సహకరించాలని విజ్ఞప్తి చేశారు. ఈ సమావేశంలో అదనపు కలెక్టర్ కిషోర్ కుమార్, జిల్లా రెవెన్యూ అధికారి రాథోడ్ రమేష్, ఆర్డీఓలు, తహసీల్దార్లు, రాజకీయ పార్టీల ప్రతినిధులు పాల్గొన్నారు.
