గిగ్ వర్కర్లకు చట్టబద్ధత: గవర్నర్ ఆమోదం, త్వరలో గెజిట్ నోటిఫికేషన్

ఈ బిల్లు లక్ష్యం యాప్ ఆధారిత అగ్రిగేటర్ల వద్ద పనిచేస్తున్న కార్మికులకు పని భద్రత, ప్రమాద, ఆరోగ్య బీమా, ఇతర సామాజిక భద్రతా పథకాలను అందించడం. చట్టం క్షేత్రస్థాయిలో అమలు కావడానికి అగ్రిగేటర్లు, గిగ్ వర్కర్ల సంఘాలతో కార్మికశాఖ అధికారులు ప్రత్యేక సమావేశం నిర్వహించనున్నారు.

ఈ సమావేశంలో కార్మికుల పనివేళలు, ఫిర్యాదుల పరిష్కార యంత్రాంగం, సంక్షేమ నిధి వంటి కీలక అంశాలపై చర్చించి తుది మార్గదర్శకాలు రూపొందిస్తారు. మరో 10-15 రోజుల్లో ఈ గైడ్‌లైన్స్‌పై ఉత్తర్వులు వెలువడే అవకాశం ఉందని అధికారులు తెలిపారు.

ఈ చట్టం గిగ్ ఎకానమీలో విప్లవాత్మక మార్పులు తెస్తుందని, కంపెనీల నిబంధనలకు ఇకపై నియంత్రణ ఉంటుందని విశ్లేషకులు భావిస్తున్నారు. కార్మికుల నుంచి వసూలు చేసే సేవా రుసుములో కొంత భాగాన్ని వారి సంక్షేమ నిధికి మళ్లించడం ద్వారా కార్మికులకు లబ్ధి చేకూరనుంది.