శాంతినికేతన్ విద్యానిలయంలో ఘనంగా ఉగాది వేడుకలు

పాఠశాలలో సాంప్రదాయ వాతావరణంలో నిర్వహించిన ఈ వేడుకల్లో విద్యార్థులు సంప్రదాయ దుస్తులు ధరించి, ఉగాది ప్రాముఖ్యతను తెలియజేస్తూ పాటలు, నృత్యాలు, ప్రసంగాలతో అలరించారు. ఉగాది పచ్చడి ప్రత్యేకతను గురువులు వివరించి, కొత్త సంవత్సరాన్ని ఆశావాదంతో ప్రారంభించాలనే సందేశాన్ని అందించారు.

పాఠశాల ప్రిన్సిపాల్ సంతోష్ మాట్లాడుతూ, ఉగాది తెలుగు ప్రజల ఆధ్యాత్మిక, సాంస్కృతిక సంప్రదాయాలకు ప్రతీక అని, విద్యార్థులు మన సంప్రదాయాలను గౌరవిస్తూ పండుగలను ఆనందంగా జరుపుకోవాలని సూచించారు. పండుగలు పిల్లలకు సంస్కృతి, సంప్రదాయాలను పరిచయం చేసే మంచి అవకాశాలని ఆయన అన్నారు.

చిన్నప్పటి నుంచే విద్యార్థులు భారతీయ సంప్రదాయాలు, పండుగల విలువలను తెలుసుకోవాలని ఆయన పేర్కొన్నారు. డైరెక్టర్ ప్రవీణ్ కూడా ఉగాది కొత్త ఆశలు, కొత్త ఆరంభాలకు ప్రతీక అని తెలిపారు.

ఈ కార్యక్రమంలో పాఠశాల ఉపాధ్యాయులు, విద్యార్థులు పెద్ద సంఖ్యలో పాల్గొని ఉగాది పండుగను ఆనందంగా జరుపుకున్నారు.