మెండోర మండలంలోని పోచంపాడ్ ఉన్నత పాఠశాలలో రోడ్డు ప్రమాదాల నివారణపై అవగాహన కార్యక్రమం నిర్వహించబడింది. ఈ కార్యక్రమంలో మెండోర పోలీస్ స్టేషన్ సబ్ ఇన్స్పెక్టర్ సుహాసిని ముఖ్య అతిథిగా హాజరై విద్యార్థులకు కీలకమైన భద్రతా సూచనలు అందించారు.
పాఠశాల ప్రధానోపాధ్యాయురాలు ప్రొద్దుటూరు మమత అధ్యక్షతన జరిగిన ఈ కార్యక్రమంలో, సబ్ ఇన్స్పెక్టర్ సుహాసిని ద్విచక్ర వాహన చోదకులకు హెల్మెట్ తప్పనిసరి అని, మద్యం సేవించి వాహనాలు నడపడం చట్టవిరుద్ధమని హెచ్చరించారు. డ్రైవింగ్ లైసెన్స్ లేకుండా వాహనాలు నడపడం, మైనర్లు వాహనాలు నడపడం వంటి అంశాలపై ఆమె స్పష్టత ఇచ్చారు.
యువతలో పెరుగుతున్న మత్తు పదార్థాల వినియోగంపై ఆందోళన వ్యక్తం చేసిన ఎస్సై, తల్లిదండ్రులు, ఉపాధ్యాయులు పిల్లలపై నిరంతరం నిఘా ఉంచాలని సూచించారు. ట్రాఫిక్ నియమాలను పాటించడం ద్వారా ప్రమాదాలను నివారించవచ్చని విద్యార్థులకు వివరించారు.
ఈ అవగాహన కార్యక్రమంలో భాగంగా, విద్యార్థులతో మత్తు పదార్థాలకు దూరంగా ఉండాలని, మైనర్లుగా వాహనాలు నడపబోమని ప్రతిజ్ఞ చేయించారు. ఈ కార్యక్రమం రోడ్డు భద్రతపై విద్యార్థులలో చైతన్యం తీసుకురావడానికి దోహదపడింది.
ఈ కార్యక్రమంలో ఉపాధ్యాయులు నజీమొద్దీన్, కవిత, సురేందర్, ధర్మపురి, చౌటి భూపతి, గోపి తదితరులు పాల్గొన్నారు.