భైంసా మండలం, దేగాం గ్రామంలో రూ. 10 లక్షల వ్యయంతో నిర్మించిన గ్రామ మహిళా సంఘ భవనాన్ని ఎమ్మెల్యే పవార్ రామరావ్ పటేల్ ప్రారంభించారు. మహిళా సాధికారత, గ్రామాభివృద్ధికి ప్రభుత్వం కట్టుబడి ఉందని ఈ సందర్భంగా ఆయన తెలిపారు.
మహిళలు అన్ని రంగాల్లోనూ పురోగతి సాధించాలని, అందుకు ప్రోత్సాహం అవసరమని ఎమ్మెల్యే పవార్ రామరావ్ పటేల్ అన్నారు. ఇటీవల భైంసా మండలం, దేగాం గ్రామంలో రూ. 10 లక్షల నిధులతో నిర్మించిన గ్రామ మహిళా సంఘ భవనాన్ని ఆయన ప్రారంభించి మాట్లాడారు.
కేంద్ర, రాష్ట్ర ప్రభుత్వాల సహకారంతో మహిళా సంఘ భవనాల నిర్మాణం జరుగుతోందని, ఈ భవన నిర్మాణానికి కేంద్ర ప్రభుత్వం 90 శాతం, రాష్ట్ర ప్రభుత్వం 10 శాతం నిధులను సమకూర్చిందని ఎమ్మెల్యే తెలిపారు. భైంసా మండలానికి 40కి పైగా ఇలాంటి భవనాల నిర్మాణానికి నిధులు మంజూరు అయ్యాయని ఆయన పేర్కొన్నారు.
రాష్ట్రంలోనే మొట్టమొదటిసారిగా దేగాం గ్రామంలో మహిళా సంఘ భవనం నిర్మాణం పూర్తి చేసుకుని ప్రారంభోత్సవం చేసుకోవడం పట్ల సర్పంచ్ సుష్మారెడ్డి, అధికారుల పనితీరును ఎమ్మెల్యే అభినందించారు. ఈ సందర్భంగా గ్రామస్తులు తమ సమస్యలను ఎమ్మెల్యే దృష్టికి తీసుకురాగా, వాటిని దశలవారీగా పరిష్కరించి, గ్రామాభివృద్ధికి నిధులు మంజూరు చేయిస్తానని హామీ ఇచ్చారు.
సిరాల ప్రాజెక్ట్ ద్వారా దేగాం ఆయకట్టుకు సాగునీరు అందించాలనే గ్రామస్తుల విజ్ఞప్తికి స్పందిస్తూ, కొన్ని చోట్ల కాలువలు అసంపూర్తిగా ఉన్నాయని, రూ. 50 లక్షల నిధులతో కాలువల నిర్మాణం పూర్తి చేసి సాగునీటిని అందిస్తామని ఎమ్మెల్యే హామీ ఇచ్చారు. నియోజకవర్గ అభివృద్ధికి తాను కట్టుబడి ఉన్నానని, 28 ప్యాకేజీలు పూర్తయితే నియోజకవర్గం సస్యశ్యామలం అవుతుందని ఆయన ఆశాభావం వ్యక్తం చేశారు.
