జిల్లా ప్రభుత్వ ఆసుపత్రిని, నిర్మాణంలో ఉన్న అత్యవసర వైద్య సేవల విభాగాన్ని కలెక్టర్ అభిలాష అభినవ్ తనిఖీ చేసి, ప్రజలకు కార్పొరేట్ తరహా వైద్య సేవలు అందించాలని అధికారులను ఆదేశించారు. బ్లడ్ బ్యాంక్ సేవలను ఉపయోగించుకున్న వారికి స్వయంగా ఫోన్ చేసి వివరాలు తెలుసుకున్నారు.
నిర్మల్ జిల్లా ప్రభుత్వ సాధారణ ఆసుపత్రిని, నిర్మాణంలో చివరి దశలో ఉన్న అత్యవసర వైద్య సేవల విభాగాన్ని జిల్లా కలెక్టర్ అభిలాష అభినవ్ బుధవారం తనిఖీ చేశారు. ఆసుపత్రి భవన నిర్మాణానికి సంబంధించిన మ్యాపులను అధికారుల నుంచి తెలుసుకున్నారు. అత్యవసర వైద్య సేవల విభాగాన్ని త్వరలోనే ప్రజలకు అందుబాటులోకి తీసుకురావాలని ఆదేశించారు.
కలెక్టర్ ఆసుపత్రిలోని శస్త్ర చికిత్సల గదులు, డయాలసిస్ కేంద్రం, ఐ.సి.యు, గైనకాలజీ, ఎలక్ట్రికల్ యూనిట్, ఫైర్ సేఫ్టీ విభాగాలను పరిశీలించారు. మిగిలి ఉన్న పనులను త్వరగా పూర్తి చేసి, వైద్య సేవలను ప్రజలకు అందుబాటులోకి తీసుకురావాలని సూచించారు. అనంతరం యుడిఐడి (సదరం) కేంద్రం, డ్రగ్స్ డి-అడిక్షన్ సెంటర్లను కూడా సందర్శించారు.
ప్రభుత్వ ఆసుపత్రిలోని బ్లడ్ బ్యాంక్ ద్వారా రక్తం పొందిన వారికి కలెక్టర్ స్వయంగా ఫోన్ చేసి వివరాలు తెలుసుకున్నారు. బ్లడ్ బ్యాంక్ రికార్డులు, రసీదులు పకడ్బందీగా నిర్వహించాలని అధికారులను ఆదేశించారు. వైద్యులు, సిబ్బంది సమయపాలన పాటిస్తూ, మెరుగైన వైద్య సేవలు అందించాలని సూచించారు.
ఈ తనిఖీల్లో ప్రభుత్వ వైద్య కళాశాల ప్రిన్సిపల్ శారద, తహసీల్దార్ రాజు, జిల్లా వైద్య ఆరోగ్యశాఖ అధికారి రాజేందర్, అధికారులు సౌమ్య, స్థానిక కౌన్సిలర్ తౌహిదుద్దిన్, ఇతర అధికారులు, సిబ్బంది పాల్గొన్నారు. అంతకుముందు పట్టణంలోని బస్తీ దవాఖానను కూడా కలెక్టర్ ఆకస్మికంగా తనిఖీ చేసి, రోగులకు సేవా దృక్పథంతో వైద్యం అందించాలని సూచించారు.
