: విజయవాడ రైల్వే స్టేషన్ సమీపంలో లోకో పైలట్ దారుణ హత్య

• విజయవాడ రైల్వే స్టేషన్ వద్ద లోకో పైలట్ డి. అబినేజర్ హత్య
• నిందితుడు రాడ్డుతో తలపై దాడి, సీసీటీవీ ఆధారంగా విచారణ
• లోకో పైలట్ అసోసియేషన్ ఆందోళన

విజయవాడ రైల్వే స్టేషన్ సమీపంలో లోకో పైలట్ డి. అబినేజర్ దారుణ హత్యకు గురయ్యారు. గురువారం రాత్రి విధుల్లో ఉన్న సమయంలో ఓ గుర్తు తెలియని వ్యక్తి రాడ్డుతో దాడి చేసి హత్యచేశాడు. సీసీటీవీ ఆధారంగా నిందితుడిని గుర్తించేందుకు పోలీసులు ప్రయత్నిస్తున్నారు. ఈ హత్యపై లోకో పైలట్ అసోసియేషన్ ఆందోళన వ్యక్తం చేసింది.

విజయవాడ రైల్వే స్టేషన్ సమీపంలో గురువారం రాత్రి 2 గంటల సమయంలో విధుల్లో ఉన్న లోకో పైలట్ డి. అబినేజర్‌ దారుణ హత్యకు గురయ్యారు. ఒక గుర్తు తెలియని వ్యక్తి రాడ్డుతో తలపై దాడి చేయగా, అబినేజర్ అక్కడికక్కడే కుప్పకూలాడు. చికిత్స కోసం హాస్పిటల్‌కు తరలించినప్పటికీ, కాసేపటికే మరణించాడు. సీసీటీవీ విజువల్స్ ఆధారంగా, నిందితుడు చొక్కా లేకుండా సంచరించినట్లు గుర్తించారు.

ఈ ఘటన రైల్వే ఉద్యోగులను, సిబ్బందిని ఉలిక్కిపడేలా చేసింది. గత రెండేళ్లలో రైల్వే స్టేషన్ పరిసర ప్రాంతాల్లో ఆరు హత్యలు జరిగినట్లు రైల్వే సిబ్బంది తెలిపారు. గంజాయి బ్యాచ్‌లు ఇలాంటి దారుణాలకు పాల్పడుతున్నాయని వారు ఆందోళన వ్యక్తం చేస్తున్నారు. ఈ నేపథ్యంలో రైల్వే లోకో పైలట్ అసోసియేషన్ నిరసన తెలిపింది.