- కల్వకుర్తి – నంద్యాల జాతీయ రహదారి 165/K భూ సర్వేను నిలిపివేయాలని డిమాండ్
- దళితుల భూములను బలవంతంగా స్వాధీనం చేసుకోవద్దని హెచ్చరిక
- సిపిఐ రాష్ట్ర కార్యదర్శి వర్గ సభ్యులు ఎం. బాల నరసింహ కఠిన వ్యాఖ్యలు
- తాడూరు గ్రామంలో భూ సర్వేకి పోలీసు భద్రత మధ్య ప్రయత్నం
- పేద రైతుల ఆత్మహత్యాయత్నాలు – ప్రభుత్వం స్పందించాలని డిమాండ్
కల్వకుర్తి – నంద్యాల జాతీయ రహదారి 167/K నిర్మాణం కోసం తాడూరు గ్రామంలో భూ సర్వే చేపడుతుండటంపై దళిత రైతులు తీవ్ర ఆగ్రహం వ్యక్తం చేశారు. ఈ భూములు తమ జీవితాధారం అని, బలవంతంగా భూ సర్వే కొనసాగితే తీవ్ర పరిణామాలు ఎదురవుతాయని సిపిఐ రాష్ట్ర కార్యదర్శి వర్గ సభ్యులు ఎం. బాల నరసింహ హెచ్చరించారు.
ఇప్పటికే తాడూరులో మూడుసార్లు సర్వే జరిగినప్పటికీ, మరోసారి దళితుల భూములను టార్గెట్ చేయడాన్ని ఆయన తీవ్రంగా విమర్శించారు. భూమి కోల్పోతామనే భయంతో దళిత రైతులు ఆత్మహత్యాయత్నాలకు పాల్పడుతున్నారు. పురుగుల మందు తాగిన మంచెల శేఖర్, చింతకురుమూర్తి ఆరోగ్య పరిస్థితిని డీఎంహెచ్వో స్వరాజ్యలక్ష్మి పరిశీలించారు.
కల్వకుర్తి – నంద్యాల జాతీయ రహదారి 167/K మార్గంలో తాడూరు గ్రామంలో భూ సర్వే చేస్తున్న నేపథ్యంలో, అక్కడి దళిత రైతులు తమ భూముల రక్షణ కోసం పోరాటం చేస్తున్నారు. “మా భూములు మా జీవనాధారం, ఇలాంటివి లాక్కోవడాన్ని సహించము” అంటూ సిపిఐ నాయకులు, రైతులు ఉద్యమాన్ని ఉధృతం చేశారు.
పోలీసుల భద్రత మధ్య నాలుగోసారి భూ సర్వే చేపట్టడాన్ని తీవ్రంగా వ్యతిరేకించిన దళితులు, “ఈ భూములను లాక్కునే యత్నం దురుద్దేశపూరితమైనది” అని ఆరోపించారు. ఇదే క్రమంలో కొంతమంది రైతులు తమ అసహాయ స్థితిని వ్యక్తం చేస్తూ ఆత్మహత్యాయత్నాలకు పాల్పడ్డారు.
సిపిఐ నాయకులు హెచ్. ఆనంద్, మారేడు శివశంకర్, కేశముల శివకృష్ణ తదితరులు ఈ నిరసనలో పాల్గొన్నారు. భూ సర్వేను వెంటనే నిలిపివేయాలని, లేదంటే తీవ్ర నిరసన కార్యక్రమాలు చేపడతామని హెచ్చరించారు.
