బాణసంచా తీసుకెళ్తే జైలుకే!
-
రైళ్లలో బాణసంచా రవాణాపై కఠిన నిషేధం
-
చిన్న నిర్లక్ష్యంతోనే భారీ ప్రమాదం సంభవించే అవకాశం
-
నిబంధనలు ఉల్లంఘిస్తే రూ.1000 జరిమానా, 3 ఏళ్ల జైలు శిక్ష
దీపావళి సందర్భంగా రైళ్లలో బాణసంచా రవాణాపై రైల్వే శాఖ హెచ్చరికలు జారీ చేసింది. రైళ్లలో బాణసంచా తీసుకెళ్లడం నిషేధమని, చిన్న నిప్పురవ్వ పడినా పెద్ద ప్రమాదం జరిగే అవకాశం ఉందని తెలిపింది. నిబంధనలు అతిక్రమిస్తే రూ.1000 జరిమానా లేదా మూడు సంవత్సరాల జైలు శిక్ష విధించవచ్చని అధికారులు వెల్లడించారు.
దీపావళి సమీపిస్తున్న నేపథ్యంలో రైళ్లలో బాణసంచా రవాణాపై రైల్వే భద్రతా విభాగం కఠిన చర్యలు చేపట్టింది. బాణసంచా వంటి దహన పదార్థాలను రైళ్లలో తీసుకెళ్లడం నిబంధనలకు వ్యతిరేకమని అధికారులు తెలిపారు. రైల్లో చిన్న నిప్పురవ్వ పడినా మొత్తం రైలు మంటల్లో దగ్ధమయ్యే ప్రమాదం ఉందని హెచ్చరించారు. ఇది భారీ ఆస్తి నష్టంతో పాటు వందల మంది ప్రయాణికుల ప్రాణాలపై ముప్పు తెస్తుందని పేర్కొన్నారు. నిబంధనలు ఉల్లంఘించినవారిపై రూ.1000 జరిమానా, మూడు సంవత్సరాల జైలు శిక్ష లేదా రెండు శిక్షలూ విధించే అధికారం రైల్వే చట్టం కింద ఉందని స్పష్టం చేశారు. భద్రత కోసం దీపావళి వేళ అధికారులు స్టేషన్లు, రైళ్లలో కట్టుదిట్టమైన తనిఖీలు చేపట్టనున్నారు.
