భారత జనాభా గణన-2025ను సమర్థవంతంగా నిర్వహించేందుకు జిల్లా అధికారులకు ప్రత్యేక శిక్షణ ఇవ్వనున్నట్లు జిల్లా కలెక్టర్ అభిలాష అభినవ్ తెలిపారు. ఈ శిక్షణ కారణంగా మార్చి 16న నిర్వహించాల్సిన ‘ప్రజావాణి’ కార్యక్రమాన్ని రద్దు చేశారు.
జిల్లా కలెక్టర్ అభిలాష అభినవ్ మాట్లాడుతూ, కేంద్ర ప్రభుత్వం, హైదరాబాద్లోని జనాభా గణన సంచాలకుల కార్యాలయం ఆదేశాల మేరకు జిల్లాలో జనాభా గణన-2025కు సంబంధించి కీలక చర్యలు చేపడుతున్నట్లు తెలిపారు. ఇందులో భాగంగా, జిల్లాలోని తహసిల్దారులు, మండల పరిషత్ అభివృద్ధి అధికారుల (ఎంపీడీఓలు) కోసం ప్రత్యేక శిక్షణా తరగతులు నిర్వహించనున్నట్లు పేర్కొన్నారు.
ఈ శిక్షణా కార్యక్రమం ఈ నెల 16వ తేదీ నుంచి 18వ తేదీ వరకు మూడు రోజుల పాటు కొనసాగుతుంది. జనాభా గణన ప్రక్రియకు సంబంధించిన విధానాలు, సమాచార సేకరణ, పర్యవేక్షణ వంటి అంశాలపై అధికారులకు సమగ్ర అవగాహన కల్పించడమే ఈ శిక్షణ ప్రధాన లక్ష్యం.
శిక్షణా తరగతులకు సంబంధిత అధికారులందరూ తప్పనిసరిగా హాజరుకావాల్సి ఉన్నందున, మార్చి 16వ తేదీన జిల్లా కలెక్టరేట్లో నిర్వహించాల్సిన ‘ప్రజావాణి’ కార్యక్రమాన్ని రద్దు చేస్తున్నట్లు కలెక్టర్ ప్రకటించారు. ఈ రద్దుపై జిల్లావాసులకు సమాచారం అందించి, సహకరించాలని కోరారు.
జిల్లావాసులు ఈ విషయాన్ని గమనించి, తమ దరఖాస్తులు, వినతులతో సోమవారం కలెక్టరేట్కు రావద్దని, తదుపరి ప్రజావాణి కార్యక్రమం గురించి త్వరలో తెలియజేస్తామని అధికారులు తెలిపారు.
