నిజామాబాద్, జూలై 26
నిజామాబాద్ జిల్లాలోని శ్రీరాంసాగర్ ప్రాజెక్టు బ్యాక్వాటర్ ప్రాంతంలో విషాదకర సంఘటన చోటుచేసుకుంది. విహారయాత్రకు వెళ్లిన నలుగురు యువకులు వరద కాలువలో జారిపడి గల్లంతవ్వగా, వారిలో ముగ్గురి మృతదేహాలను సహాయక బృందాలు వెలికితీశాయి. మరో యువకుడి కోసం గాలింపు చర్యలు కొనసాగుతున్నాయి.
ముప్కాల్ పోలీస్స్టేషన్ పరిధిలోని శ్రీరాంసాగర్ ప్రాజెక్టు బ్యాక్వాటర్ ప్రాంతంలో ఆదివారం విషాద ఘటన చోటుచేసుకుంది. విహారయాత్రకు వచ్చిన నలుగురు యువకులు ప్రమాదవశాత్తు వరద కాలువలో జారిపడి గల్లంతయ్యారు. గల్లంతైన వారిలో ముగ్గురి మృతదేహాలను సహాయక బృందాలు వెలికితీశాయి. మరో యువకుడి కోసం గజ ఈతగాళ్లు, జాతీయ విపత్తు స్పందన దళం సిబ్బంది ముమ్మరంగా గాలింపు చర్యలు చేపడుతున్నారు.
ప్రాథమిక సమాచారం ప్రకారం మహారాష్ట్రలోని బోకర్కు చెందిన 17 ఏళ్ల ఆర్హాన్తో పాటు నిజామాబాద్ ఆటోనగర్కు చెందిన కలీం (24), అమ్ము అలియాస్ నజువత్ (24), అజీమ్ (24), ఖలీంలు కలిసి శ్రీరాంసాగర్ ప్రాజెక్టు బ్యాక్వాటర్ ప్రాంతానికి విహారయాత్రకు వెళ్లారు. ఈ సందర్భంగా వరద కాలువ సమీపంలో ఉండగా ప్రమాదవశాత్తు కాలుజారి వేగంగా ప్రవహిస్తున్న నీటిలో పడిపోయి గల్లంతయ్యారు.
సమాచారం అందుకున్న వెంటనే నిజామాబాద్ పోలీస్ కమిషనర్ పి. సాయి చైతన్య సంఘటన స్థలానికి చేరుకుని సహాయక చర్యలను స్వయంగా పర్యవేక్షించారు. గల్లంతైన వారిని వీలైనంత త్వరగా గుర్తించి బయటకు తీసేందుకు అన్ని శాఖల అధికారులు సమన్వయంతో పనిచేయాలని ఆదేశించారు. పోలీసు, రెవెన్యూ, అగ్నిమాపక శాఖల సిబ్బందితో పాటు గజ ఈతగాళ్లు, జాతీయ విపత్తు స్పందన దళం బృందాలు సంయుక్తంగా గాలింపు చర్యలు చేపట్టాయి. నీటి ప్రవాహం అధికంగా ఉండటంతో పాటు నీటి లోతు ఎక్కువగా ఉండటంతో సహాయక చర్యలకు ఇబ్బందులు ఎదురైనా బృందాలు నిరంతరం గాలింపు కొనసాగించాయి.
ఈ ఘటనలో గల్లంతైన నలుగురిలో ముగ్గురి మృతదేహాలను వెలికితీసినట్లు అధికారులు తెలిపారు. మరో వ్యక్తి కోసం గాలింపు చర్యలు కొనసాగుతున్నాయి. సంఘటన స్థలంలో పోలీసు అధికారులు నిరంతరం పర్యవేక్షిస్తూ సహాయక చర్యలను సమన్వయం చేస్తున్నారు. ఆర్మూర్ ఏసీపీ వెంకటేశ్వర్ రెడ్డి, ఆర్మూర్ రూరల్ సీఐ జాన్ రెడ్డి, ముప్కాల్ ఎస్ఐ సుహాసిని, ఇతర పోలీసు అధికారులు, సిబ్బంది, రెవెన్యూ అధికారులు, జాతీయ విపత్తు స్పందన దళం బృందాలు సంఘటన స్థలంలో ఉండి సహాయక చర్యలను పర్యవేక్షిస్తున్నారు.
ఈ విషాద ఘటనపై పోలీస్ కమిషనర్ పి. సాయి చైతన్య తీవ్ర దిగ్భ్రాంతి వ్యక్తం చేశారు. మృతుల కుటుంబ సభ్యులకు ప్రగాఢ సానుభూతి తెలిపారు. గల్లంతైన మరో వ్యక్తి కోసం అన్ని వనరులను వినియోగించి గాలింపు చర్యలు కొనసాగించాలని అధికారులను ఆదేశించారు.
వర్షాకాలంలో ప్రాజెక్టులు, బ్యాక్వాటర్ ప్రాంతాలు, వరద కాలువలు, చెరువులు, నదుల వద్ద అత్యంత అప్రమత్తంగా ఉండాలని పోలీసులు సూచించారు. సెల్ఫీలు దిగడం, ఈత కొట్టడం లేదా సరదాగా నీటిలోకి వెళ్లడం ప్రమాదకరమని హెచ్చరించారు. నీటి లోతు, ప్రవాహం తెలియని ప్రాంతాల్లోకి వెళ్లకుండా జాగ్రత్తలు తీసుకోవాలని, పోలీసు మరియు సంబంధిత శాఖల సూచనలను తప్పనిసరిగా పాటించాలని కోరారు. ప్రాణ భద్రతే అత్యంత ముఖ్యమని స్పష్టం చేశారు.
