నానమ్మ కళ్లలో ఆనందం కోసం హత్య..!!

• పరువు కోసం కన్న కొడుకుని హత్య చేసిన భార్య కుటుంబ సభ్యులు.
• సూర్యాపేటలో ప్రేమ వివాహం చేసుకున్న వడ్లకొండ కృష్ణను భార్గవి కుటుంబం హత్య.
• మృతదేహాన్ని కారులో తిప్పుతూ చివరకు కాల్వకట్టపై పడేసిన నిందితులు.
• నానమ్మ బుచ్చమ్మ హత్యలో కీలక భూమిక పోషించినట్లు పోలీసులు గుర్తింపు.

సూర్యాపేట జిల్లాలో పరువు కోసం కులాంతర వివాహం చేసిన వడ్లకొండ కృష్ణను భార్య భార్గవి కుటుంబం హత్య చేసింది. నానమ్మ బుచ్చమ్మ ప్రోత్సాహంతో సోదరులు నవీన్, వంశీ, తండ్రి సైదులు, మరో ఇద్దరు కలిసి ప్లాన్ చేసి ఆదివారం రాత్రి కృష్ణను హత్య చేశారు. అనంతరం మృతదేహాన్ని కారులో తిప్పుతూ చివరికి పిల్లలమర్రి కాల్వకట్టపై పడేశారు.

:
సూర్యాపేట జిల్లాలో ఘోరం చోటుచేసుకుంది. కులాంతర వివాహం చేసుకున్న వడ్లకొండ కృష్ణను అతని భార్య భార్గవి కుటుంబ సభ్యులు హత్య చేశారు. సోమవారం వెలుగుచూసిన ఈ పరువు హత్య కేసులో మొత్తం ఆరుగురిని పోలీసులు అరెస్ట్ చేశారు. అరెస్టయిన నిందితులు భార్గవి సోదరులు నవీన్, వంశీ, తండ్రి సైదులు, నానమ్మ బుచ్చమ్మ, మరో ఇద్దరు మహేశ్, సాయి చరణ్.

హత్యకు ముందుగా పక్కా ప్లాన్

కృష్ణ-భార్గవి ప్రేమించి ఆరు నెలల క్రితం పెళ్లి చేసుకున్నారు. అయితే ఈ వివాహాన్ని భార్గవి కుటుంబం పూర్తిగా వ్యతిరేకించింది. దీంతో, సోదరులు నవీన్, వంశీ గత రెండు నెలలుగా కృష్ణను హత్య చేయడానికి పథకం రచించారు. గతంలో మూడు సార్లు ప్రయత్నించినా విఫలమయ్యారు. ఆదివారం రాత్రి 9 గంటల సమయంలో, నిందితుల్లో ఒకరైన బైరు మహేశ్ వ్యవసాయ భూమిలో కృష్ణను హత్య చేశారు.

నానమ్మ బుచ్చమ్మ కీలక భూమిక

ఈ హత్యలో నానమ్మ బుచ్చమ్మ కీలక పాత్ర పోషించిందని పోలీసులు గుర్తించారు. మనవరాలు భార్గవి ప్రేమ వివాహం ఆమెకు ఇష్టం లేకపోవడంతో కొంతకాలంగా కుమారుడు, మనవళ్లను రెచ్చగొడుతూ హత్యకు పరోక్షంగా కారణమయ్యారు. కృష్ణ హత్య తర్వాత, మృతదేహాన్ని కారులో తీసుకెళ్లి బుచ్చమ్మకు చూపించి సంతృప్తి పరిచారు. అనంతరం మృతదేహాన్ని నల్గొండ వరకు తీసుకెళ్లి మాయం చేసేందుకు ప్రయత్నించారు. చివరకు ఏం చేయాలో తెలియక పిల్లలమర్రి కాల్వకట్టపై పడేశారు.

ఈ ఘటనపై విచారణ కొనసాగుతున్నట్లు ఎస్పీ సన్‌ప్రీత్ సింగ్ వెల్లడించారు. నిందితుల నుంచి కారు, 5 సెల్‌ఫోన్లు, హత్యకు ఉపయోగించిన కత్తి స్వాధీనం చేసుకున్నారు.