రంజాన్ మాసానికి మౌలిక సదుపాయాలు కల్పించాలి

• మార్చి 1 నుండి ప్రారంభం కానున్న పవిత్ర రంజాన్ మాసం కోసం ఏర్పాట్లు చేపట్టాలని డిమాండ్
• షాద్ నగర్ మున్సిపల్ కమిషనర్ సునీతకు వినతి పత్రం అందజేసిన ముస్లిం ప్రముఖులు
• మంచినీటి సరఫరా, వీధి లైట్లు, పారిశుధ్యం వంటి అంశాలపై ప్రత్యేక దృష్టి పెట్టాలని విజ్ఞప్తి

రంజాన్ మాసం ప్రారంభం కానుండటంతో షాద్ నగర్ మున్సిపాలిటీ పరిధిలో మౌలిక సదుపాయాల కల్పనకు చర్యలు తీసుకోవాలని ముస్లిం నాయకులు మున్సిపల్ కమిషనర్ సునీతకు వినతి పత్రం అందజేశారు. ప్రార్థనా స్థలాల వద్ద పరిశుభ్రత, వీధి లైట్లు, మంచినీటి సరఫరా వంటి అంశాలపై కమిషనర్‌ తో చర్చించారు.

ఫిబ్రవరి 27, రంగారెడ్డి జిల్లా: రంజాన్ మాసం సందర్భంగా ముస్లిం ప్రజలకు అవసరమైన మౌలిక సదుపాయాలను సమకూర్చేందుకు షాద్ నగర్ మున్సిపాలిటీ ప్రత్యేక చర్యలు తీసుకోవాలని ముస్లిం ప్రముఖులు మున్సిపల్ కమిషనర్ సునీతను కలిసి వినతి పత్రం సమర్పించారు.

ఈ సందర్భంగా మార్కెట్ కమిటీ వైస్ చైర్మన్, కాంగ్రెస్ మైనార్టీ నేత మహమ్మద్ అలీ ఖాన్ బాబర్, సీనియర్ నాయకులు మహమ్మద్ ఇబ్రహీం, సయ్యద్ ఖదీర్, ముబారక్ అలీ ఖాన్, అలీం, కబీర్, జాఫర్ తదితరులు మున్సిపల్ కమిషనర్‌ను స్వయంగా కలుసుకున్నారు.

వారు ప్రధానంగా మంచినీటి సరఫరా, వీధి లైట్లు, రోడ్ల పారిశుధ్యం, ప్రార్థనా స్థలాల వద్ద పరిశుభ్రత, మసీదుల వద్ద ట్రాఫిక్ నియంత్రణ వంటి అంశాలపై చర్చించారు. రంజాన్ మాసంలో ఉపవాస దీక్షలు పాటించే ముస్లింలకు ఎలాంటి అసౌకర్యం కలగకుండా మౌలిక సదుపాయాలను మెరుగుపరిచేలా చర్యలు తీసుకోవాలని కోరారు. మున్సిపల్ కమిషనర్ సునీత దీనిపై సానుకూలంగా స్పందించి తగిన ఏర్పాట్లు చేస్తామని హామీ ఇచ్చారు.