ధనుర్మాస ఆరంభం.. ముస్తాబైన హమాల్వాడి సాయిబాబా – సంతోష్ మాత ఆలయం
మనోరంజని తెలుగు టైమ్స్ – నిజామాబాద్ డిసెంబర్ 15
ధనుర్మాసం ప్రారంభం సందర్భంగా నిజామాబాద్ జిల్లా కేంద్రంలోని హమాల్వాడిలో ఉన్న శ్రీ సాయిబాబా – సంతోష్ మాత ఆలయం శోభాయమానంగా ముస్తాబైంది. ధనుర్మాసాన్ని పురస్కరించుకుని ఆలయాన్ని ప్రత్యేకంగా పూలు, విద్యుత్ దీపాలతో అలంకరించారు. తెల్లవారుజామున నుంచే భక్తులు పెద్ద సంఖ్యలో ఆలయానికి చేరుకుని ప్రత్యేక పూజలు, అభిషేకాలు నిర్వహించారు. ఈ సందర్భంగా ఆలయంలో సుప్రభాత సేవ, విశేష అలంకార సేవలు భక్తిశ్రద్ధలతో జరిగాయి. ధనుర్మాసం ఆధ్యాత్మిక పరంగా ఎంతో ప్రాముఖ్యత కలిగినదని, ఈ నెలంతా భక్తులు నిత్య పూజలు, దీపారాధనలతో భగవంతుని కృప పొందుతారని ఆలయ పూజారులు తెలిపారు. ఆలయానికి వచ్చిన భక్తులు సాయిబాబా, సంతోష్ మాత దర్శనం చేసుకుని ప్రత్యేక ప్రార్థనలు చేశారు. ధనుర్మాసం ఆరంభంతో ఆలయ ప్రాంగణం భక్తి వాతావరణంతో మారుమ్రోగింది. ఈ కార్యక్రమంలో ఆలయ కమిటీ సభ్యులు, స్థానికులు, భక్తులు పెద్ద సంఖ్యలో పాల్గొన్నారు.
