ఓటర్ల జాబితా సవరణలో తప్పులు, నేరస్తుల్లా ఫోటోలు తీయడంపై విమర్శలు

నోటీసులు అందడంతో తగిన ధృవీకరణ పత్రాలతో సచివాలయ కేంద్రాలతో పాటు, ఇతర పరిశీలనా కేంద్రాలకు వెడుతున్న ఓటర్లకు తీవ్రమైన అవమానం ఎదురవుతోంది. పోలీస్ స్టేషన్లలో నేరస్తుల ఫోటోలు తీసే విషయం తెలిసిందే. అదే విధంగా ధృవీకరణ పత్రాలను ఓటర్ల చేత పట్టించి సిబ్బంది ఫోటోలు తీస్తున్నారు. అదేమని అడిగితే పై నుంచి ఆదేశాలు అని చెబుతున్నారని బాధితులు వాపోయారు. రాజ్యాంగం ప్రకారం దేశంలోని ప్రతి ఒక్కరికి ఓటు హక్కు కల్పించి తీరాలి. ఏదైనా తప్పు ఉంటే దానిని నిరూపించాల్సిన బాధ్యత ఎన్నికల కమిషన్దే. ప్రస్తుత ప్రక్రియలో ఎన్నికల కమిషన్ ఆ రాజ్యాంగ స్ఫూర్తికి పూర్తి భిన్నంగా వ్యవహరించడంతో పాటు, ప్రజలను ఇలా అవమానపరిచేలా వ్యవహరిస్తుండటం విమర్శలకు దారితీస్తోంది.

తప్పుడు వివరాలు ఇస్తే జైలు శిక్ష హెచ్చరికలు

తప్పుడు వివరాలు ఇచ్చారంటూ ఎన్నికల కమిషన్ ప్రజలను భయపెడుతున్న తీరు మరింత ఆందోళన కలిగిస్తోంది. ఓటర్లకు ఇచ్చిన (చూపిస్తున్న) నోటీసుల్లోని రెండవ పేజీలో ఆ అంశాలను ఎన్నికల కమిషన్ పేర్కొంది. అనేకచోట్ల నోటీసు వచ్చినట్లు చెప్పి సంతకాలు తీసుకుని పోతుండటంతో వాటిని చదివే అవకాశం కూడా ఓటర్లకు ఉండటం లేదు. ప్రభుత్వ ఉద్యోగులకు తప్పుడు సమాచారం ఇచ్చారన్న కారణంతో జైలు శిక్ష విధించే అవకాశం ఉందని, ఓటర్ల జాబితా తయారీ, సవరణ, సరిదిద్దడం, చేర్చడం తదితర ప్రక్రియలో తప్పుడు ప్రకటన చేస్తే జైలుశిక్ష, జరిమానా రెండింటినీ కలిపి విధిస్తారని ఈ పేజీలో పేర్కొన్నారు. అదే విధంగా విచారణ సమయంలో తప్పుడు ధృవీకరణ పత్రాలు ఇచ్చినా, ఉద్దేశ్యపూర్వకంగా తప్పుడు ప్రకటన చేసినా చట్ట ప్రకారం చర్యలు తీసుకుంటామని కూడా హెచ్చరించారు. అయితే, అసలు తప్పు చేస్తున్నది ఎవరు శిక్ష ఎవరికి పడుతోందన్నదే అసలైన ప్రశ్న.

80 ఏళ్ల వృద్ధురాలికి ఇబ్బందులు

కల్పనాకుమారి గోపిసెట్టి పేరు 2002 నాటి ఓటర్ల జాబితాలో కల్పనా కుమారి జి అని ఉంది. అధికారులకు సందేహం వచ్చి, తమ ముందుకు వచ్చి అసలైన ఇంటిపేరు నిరూపించుకోవాల్సిందేనని ఆదేశించారు. ఆమె వయసు 80 సంవత్సరాలు. ప్రస్తుతం గుంటూరు జిల్లాలోని ఉండవల్లిలో తమ కుమార్తె వద్ద ఉంటున్నారు. ఆమె ఓటు ఎన్టీఆర్ జిల్లాలోని జి.కొండూరు మండలంలో ఉంది. నోటీసు వచ్చిన సమాచారం రావడంతో అధికారులు సూచించిన తేదీకి నానా కష్టాలు పడి ఆమె ఆ ఊరికి ప్రయాణమయ్యారు. మధ్య దారిలోనే సంబంధిత అధికారి లేరని, మరోసారి రావాలని ఆమెకు ఫోన్ వచ్చింది. దీంతో వెనక్కి వచ్చిన ఆమె మళ్లీ అధికారులు చెప్పిన తేదీకి వెళ్లి, వారు అడిగిన పత్రాలు చూపించి వచ్చారు.

తండ్రి పేరులో అక్షరం తేడాకే వివరణ

తండ్రి పేరు రామచంద్రయ్య వారణాసి అని స్పష్టంగా కనిపిస్తోంది. ఇంగ్లీషులో అని ఉంది. అక్షరం లేదు. ఈ తప్పు ఎవరిది 2002 ఓటర్ల జాబితాకు, ప్రస్తుత జాబితాకు తండ్రి పేరులో వ్యత్యాసం ఉండటంతో ఓటర్ల లిస్టులో పేరు కొనసాగించడానికి సరైన ధృవీకరణ పత్రాలు చూపించాల్సిందేనని ఎన్నికల సంఘం ఆదేశించింది. సవరణ ప్రక్రియలో భాగంగా నింపి ఇచ్చిన గణన ఫారంలో సరైన వివరాలు ఇచ్చినప్పటికీ, వాటిని ఏమాత్రం పట్టించుకోని ఎన్నికల సంఘ అధికారులు తమ ముందు హాజరై తీరాల్సిందేనని ఆదేశిస్తున్నారు.