పిప్రి లిఫ్ట్ ఇరిగేషన్ పథకానికి అదనంగా ₹77 కోట్ల నిధులను ప్రస్తుత ప్రభుత్వం మంజూరు చేసిందని, వచ్చే జూన్ నుంచి సుమారు 5 వేల ఎకరాలకు సాగునీరు అందుతుందని ఎమ్మెల్యే పవార్ రామారావ్ పటేల్ తెలిపారు.
గతంలో పిప్రి లిఫ్ట్ ఇరిగేషన్ పథకం పేరుకే పరిమితమైందని, రైతులకు సాగునీరు అందక నష్టపోయారని ఎమ్మెల్యే పవార్ రామారావ్ పటేల్ అన్నారు. గత పాలకుల నిర్లక్ష్యం వల్లే ఈ పరిస్థితి తలెత్తిందని ఆయన విమర్శించారు.
ఈ పథకం కోసం గత ప్రభుత్వం ₹58 కోట్లు కేటాయించగా, ప్రస్తుత ప్రభుత్వం అదనంగా ₹77 కోట్ల నిధులను మంజూరు చేసిందని ఆయన పేర్కొన్నారు. ఈ నిధులతో పిప్రి, నగర్, రాయపూర్ కాండ్లి వంటి గ్రామాలకు సాగునీరు అందించే పనులు చేపట్టనున్నట్లు తెలిపారు.
ముఖ్యమంత్రి రేవంత్ రెడ్డి, నీటిపారుదల శాఖ మంత్రి ఉత్తమ్కుమార్ రెడ్డిని సంప్రదించగా, వారు వెంటనే స్పందించి నిధులకు ఆమోదం తెలిపారని ఎమ్మెల్యే తెలిపారు.
రాబోయే జూన్ మాసం నుంచి ఈ లిఫ్ట్ ఇరిగేషన్ ప్రాజెక్ట్ ద్వారా సుమారు 5 వేల ఎకరాల భూములకు సాగునీరు అందుతుందని, ఇది పరిసర గ్రామాల రైతులకు ఎంతో ప్రయోజనకరంగా ఉంటుందని ఎమ్మెల్యే ఆశాభావం వ్యక్తం చేశారు.