బైంసా నియోజకవర్గంలో ఈదురు గాలులు, వడగళ్ల వాన కారణంగా మొక్కజొన్న, జొన్న, శనగ వంటి పంటలు వేసిన రైతులకు భారీ నష్టం వాటిల్లింది. ప్రభుత్వం తక్షణమే స్పందించి ఆదుకోవాలని ఎమ్మెల్యే పవార్ రామరావ్ పటేల్ డిమాండ్ చేశారు.
తానూర్ మండలంలోని ఎల్వత్ గ్రామంలో నష్టపోయిన పంటలను పరిశీలించిన అనంతరం ఎమ్మెల్యే పటేల్ మాట్లాడారు. నియోజకవర్గంలోని అన్ని మండలాల్లోనూ ఇదే పరిస్థితి నెలకొందని, రైతులు తీవ్రంగా నష్టపోయారని ఆయన తెలిపారు.
సాధారణంగా ఎకరానికి 30-40 క్వింటాళ్ల దిగుబడి వచ్చే మొక్కజొన్న, ఈ వర్షం కారణంగా కేవలం 5 క్వింటాళ్లకు పరిమితమైందని, ఇది రైతులకు తీరని నష్టాన్ని కలిగిస్తోందని ఆయన ఆవేదన వ్యక్తం చేశారు.
అధికారులు వెంటనే సర్వే చేపట్టి, నష్టాన్ని అంచనా వేయాలని, ఈ విషయాన్ని ప్రభుత్వ దృష్టికి తీసుకెళ్లి, రైతుల తరపున పోరాడతానని ఎమ్మెల్యే పటేల్ హామీ ఇచ్చారు. వచ్చే అసెంబ్లీ సమావేశాల్లోనూ ఈ అంశాన్ని ప్రస్తావిస్తామని ఆయన తెలిపారు.
ఎకరానికి సుమారు 50 వేల రూపాయల వరకు నష్టపోయిన రైతులకు ప్రభుత్వం తగిన సహాయం అందించాలని, ఇది ప్రభుత్వ బాధ్యత అని ఎమ్మెల్యే నొక్కి చెప్పారు.
