నిజామాబాద్ జిల్లాలో నూతనంగా ఏర్పాటైన మెండోర మండలం పరిధిలోని కొన్ని ప్రాంతాల్లో ఇప్పటికీ పాత మండలం పేర్లే కొనసాగుతుండటం స్థానికుల్లో ఆగ్రహం వ్యక్తం అవుతోంది. ముఖ్యంగా దూదిగాం గ్రామంలోని అంగన్వాడి కేంద్రంలో బాల్కొండ మండలం పేరు నమోదు చేయబడి ఉండటం అధికారుల నిర్లక్ష్యానికి అద్దం పడుతోంది.
మెండోర నూతన మండలం ఏర్పాటై చాలా కాలం గడిచినప్పటికీ, ప్రభుత్వ రికార్డుల్లో, కార్యాలయ బోర్డుల్లో, అధికారిక పత్రాల్లో కొత్త మండలం పేరు నమోదు చేయడంలో అధికారులు విఫలమయ్యారు. దీనివల్ల ప్రజలు పరిపాలనాపరమైన ఇబ్బందులు ఎదుర్కొంటున్నారు.
దూదిగాం గ్రామంలోని అంగన్వాడి కేంద్రం (231)లో బాల్కొండ మండలం పేరు కొనసాగడం, కొత్త మండలం ఏర్పాటైన వాస్తవాన్ని విస్మరించినట్లు స్పష్టంగా తెలుపుతోంది. ఈ విషయంపై గ్రామస్తులు తీవ్ర అసంతృప్తి వ్యక్తం చేస్తున్నారు.
పరిపాలనా సౌలభ్యం కోసం ప్రభుత్వం నూతన మండలాలను ఏర్పాటు చేసినప్పటికీ, వాటిని సక్రమంగా అమలు చేయడంలో అధికారుల నిర్లక్ష్యం స్పష్టంగా కనిపిస్తోంది. ఈ లోపాన్ని వెంటనే సరిదిద్దాలని ప్రజలు కోరుతున్నారు. తక్షణ చర్యలు తీసుకోకపోతే ఆందోళనలు చేపట్టే అవకాశం ఉందని హెచ్చరిస్తున్నారు.
