జగిత్యాల జిల్లాలోని ప్రసిద్ధ కొండగట్టు ఆంజనేయ స్వామి దేవాలయం, హనుమాన్ జయంతి వేడుకల సందర్భంగా భక్తుల రద్దీతో కిటకిటలాడుతోంది. వివిధ ప్రాంతాల నుంచి వేలాది మంది భక్తులు తరలివస్తుండటంతో ఆలయ పరిసరాలు ఆధ్యాత్మిక వాతావరణంతో నిండిపోయాయి.
హనుమాన్ జయంతి సందర్భంగా కొండగట్టు క్షేత్రం ప్రత్యేక శోభను సంతరించుకుంది. మంగళవారం జరగనున్న ప్రధాన వేడుకల్లో పాల్గొనేందుకు దేశంలోని వివిధ రాష్ట్రాలు, జిల్లాల నుంచి భక్తులు, దీక్షపరులు పెద్ద సంఖ్యలో చేరుకున్నారు. దీంతో ఆలయ పరిసరాలు కాషాయ వస్త్రాలతో, 'జైశ్రీరామ్' నినాదాలతో మారుమోగుతున్నాయి.
తెల్లవారుజాము నుంచే ఆలయ అర్చకులు స్వామి వారికి ప్రత్యేక అభిషేకాలు, పూజలు నిర్వహించారు. ప్రభుత్వ యంత్రాంగం తరపున అంజన్నకు పట్టువస్త్రాలను సమర్పించనున్నట్లు సమాచారం. భక్తుల రాకతో ఆలయ ప్రాంగణం భక్తిశ్రద్ధలతో వెల్లివిరుస్తోంది.
గత సోమవారం రాత్రి నుంచే కొందరు దీక్షపరులు ఆలయానికి చేరుకుని, మొక్కులు చెల్లించుకుని, కళ్యాణకట్ట భవనంలో మాలవిరమణ చేసుకుంటున్నారు. వేడుకల నిర్వహణకు ఆలయ అధికారులు, స్థానిక యంత్రాంగం విస్తృత ఏర్పాట్లు చేసింది.
భారీగా తరలివస్తున్న భక్తుల సౌకర్యార్థం జిల్లా యంత్రాంగం తాగునీటి సౌకర్యం, చలువ పందిళ్లు, ప్రత్యేక క్యూలైన్లు ఏర్పాటు చేసింది. భక్తులకు ఎటువంటి అసౌకర్యం కలగకుండా ట్రాఫిక్ నియంత్రణకు భారీగా పోలీసులను మోహరించారు. దీక్ష విరమణ చేసే భక్తుల కోసం ప్రత్యేక ఏర్పాట్లు చేసినట్లు అధికారులు వెల్లడించారు.
