ఖానాపూర్, 2026-08-05
ఖానాపూర్ మండలంలోని దాదాపు 80 పాఠశాలల్లో కనీస వసతులు లేకపోయినా, విద్యాశాఖ అధికారులు అనుమతులు మంజూరు చేస్తూ విద్యార్థుల భవిష్యత్తుతో ఆడుకుంటున్నారని ఎంసీపీఐయూ నాయకులు ఆరోపించారు. అధిక ఫీజులు వసూలు చేస్తున్నా అధికారులు పట్టించుకోవడం లేదని విమర్శించారు.
ఖానాపూర్ మండలంలోని దాదాపు 80 పాఠశాలల్లో సరైన వసతులు లేకపోయినా, విద్యాశాఖ అధికారులు అనుమతులు మంజూరు చేస్తూ విద్యావ్యవస్థను అథోగతి పాలు చేస్తున్నారని ఎంసీపీఐయూ నిర్మల్ జిల్లా కార్యదర్శి అల్లెపు పీటర్, సహాయ కార్యదర్శి భూక్య సురేందర్, జిల్లా కమిటీ సభ్యురాలు పి. స్వరూప విమర్శించారు. పాఠశాలల్లో బాత్రూమ్లు సరిగా లేకపోవడం, ఆట స్థలాలకు స్థలం కొరత, ఫ్యాన్లు పనిచేయకపోవడం, పిల్లలకు సరైన బోధన అందించకపోవడం వంటి సమస్యలున్నాయని, దీనివల్ల పిల్లల భవిష్యత్తుతో విద్యాశాఖ అధికారులు చెలగాటమాడుతున్నారని వారు ఆరోపించారు.
అధిక ఫీజులు వసూళ్లు.. అధికారులు పట్టించుకోరా
పాఠశాలల్లో పిల్లలకు దుస్తులు, పుస్తకాలు అందించడంలో, అధిక ఫీజులు వసూలు చేయడంలో యాజమాన్యాలు వ్యవహరిస్తున్న తీరును అధికారులు పట్టించుకోకుండా, చూసీ చూడనట్లుగా వ్యవహరించడం పట్ల ఎంసీపీఐయూ నిర్మల్ జిల్లా నాయకులు అల్లెపు పీటర్, బుక్య సురేందర్లు ఆగ్రహం వ్యక్తం చేశారు. లక్షల జీతాలు తీసుకుంటున్న విద్యాశాఖ అధికారులు పిల్లల భవిష్యత్తు గురించి ఎందుకు ఆలోచించడం లేదని, నిబంధనలకు విరుద్ధంగా అనుమతులు ఎలా ఇస్తున్నారని ప్రశ్నించారు.
చట్ట ప్రకారం లేని స్కూళ్ల రద్దుకు డిమాండ్
చట్ట ప్రకారం అన్ని వసతులు లేని పాఠశాలలను తక్షణమే రద్దు చేయాలని ఎంసీపీఐయూ నాయకులు డిమాండ్ చేశారు. ఈ విషయంలో అధికారులు స్పందించకుంటే, ఎంఈఓ, డీఈవో కార్యాలయాల ముందు నిరాహార దీక్ష చేపడతామని హెచ్చరించారు. విద్యార్థుల భవిష్యత్తుతో చెలగాటమాడే విద్యా వ్యవస్థను సరిదిద్దాల్సిన బాధ్యత అధికారులపై ఉందని వారు అన్నారు.
