ఖానాపూర్, జూలై 25
వర్షాకాలంలో సీజనల్ వ్యాధుల వ్యాప్తిని అరికట్టేందుకు ఖానాపూర్ పట్టణంలో ముందస్తు చర్యలు చేపట్టారు. పట్టణంలోని అన్ని 12 వార్డుల్లో దోమల నివారణకు ఫాగింగ్ కార్యక్రమాన్ని మున్సిపాలిటీ సిబ్బంది నిర్వహిస్తున్నారు. ప్రజల ఆరోగ్యాన్ని కాపాడేందుకు ఈ కార్యక్రమం చేపట్టినట్లు మున్సిపల్ చైర్మన్ తెలిపారు.
వర్షాకాలాన్ని దృష్టిలో ఉంచుకుని, ఖానాపూర్ పట్టణ ప్రజలు డెంగ్యూ, మలేరియా, టైఫాయిడ్ వంటి సీజనల్ వ్యాధుల బారిన పడకుండా ముందస్తు జాగ్రత్త చర్యల్లో భాగంగా పట్టణంలోని అన్ని వార్డుల్లో దోమల నివారణకు ఫాగింగ్ కార్యక్రమాన్ని చేపట్టారు.
ఖానాపూర్ మున్సిపల్ చైర్మన్ అంకం మౌనిక మహేందర్ ఆధ్వర్యంలో మున్సిపాలిటీ సిబ్బంది దోమల నివారణ కోసం ఫాగింగ్ చేపడుతున్నారు. ఈ సందర్భంగా మున్సిపల్ చైర్మన్ మాట్లాడుతూ, వర్షాకాలంలో దోమల వ్యాప్తి పెరిగే అవకాశం ఉన్నందున ప్రజల ఆరోగ్యాన్ని దృష్టిలో ఉంచుకుని పట్టణంలోని ప్రతి వార్డులో దోమల నివారణకు ఫాగింగ్ చేయిస్తున్నట్లు తెలిపారు.
తొలిదశలో ఒకటో వార్డులో ఫాగింగ్ ప్రారంభించామని, అనంతరం పట్టణంలోని మొత్తం 12 వార్డుల్లో మున్సిపాలిటీ సిబ్బంది రోజువారీగా ఫాగింగ్ నిర్వహిస్తారని ఆమె పేర్కొన్నారు.
ప్రజలు కూడా తమ పరిసరాల్లో నీరు నిల్వ ఉండకుండా చూసుకోవాలని, దోమల వృద్ధిని అరికట్టేందుకు మున్సిపాలిటీ సిబ్బందికి సహకరించాలని ఆమె కోరారు.
