సారంగాపూర్ మండలం కాల్వతండా గ్రామంలో గ్రామ ఆడపడుచులకు ఇచ్చిన ఎన్నికల హామీని నిలబెట్టుకుంటూ గ్రామ సర్పంచ్ జాదవ్ ప్రేమ్ ఆధ్వర్యంలో ‘ప్రైవేట్ కళ్యాణ లక్ష్మి’ పథకాన్ని ప్రారంభించారు. ఈ పథకం ద్వారా వివాహం చేసుకునే ప్రతి వధువుకు రూ.5,160 ఆర్థిక సహాయం అందించబడుతుంది.
బుధవారం మధ్యాహ్నం స్థానిక వివాహ మండపంలో జరిగిన కార్యక్రమంలో గ్రామానికి చెందిన ఓ పెళ్లికూతురికి రూ.5,160 నగదు అందజేసి, ఆమెకు శుభాకాంక్షలు తెలిపారు. ఈ కార్యక్రమంలో గ్రామ పెద్దలు, యువకులు, మహిళలు పాల్గొన్నారు. సర్పంచ్ చొరవను గ్రామస్తులు అభినందించారు.
ఈ సందర్భంగా సర్పంచ్ జాదవ్ ప్రేమ్ మాట్లాడుతూ, “ఎన్నికల సమయంలో గ్రామ ఆడపడుచులకు ఇచ్చిన మాట ప్రకారం ఈ సహాయాన్ని అందిస్తున్నాం. ఇది కేవలం ఆర్థిక సహాయం మాత్రమే కాదు, ప్రతి ఆడబిడ్డకు మనమంతా అండగా ఉన్నామనే భరోసా. భవిష్యత్తులో గ్రామంలో జరిగే ప్రతి వివాహానికి ఈ పథకాన్ని కొనసాగిస్తాం” అని తెలిపారు. ఈ పథకం ద్వారా గ్రామంలోని మహిళలకు కొంతమేర ఆర్థిక భరోసా లభించే అవకాశం ఉందని అన్నారు.
గ్రామస్తులు మాట్లాడుతూ, ఇచ్చిన మాటను నిలబెట్టుకుని ప్రజలకు అందుబాటులో ఉంటున్న ప్రజాప్రతినిధిగా సర్పంచ్ వ్యవహరిస్తున్నారని ప్రశంసించారు. గ్రామ సంక్షేమం కోసం కొత్త కార్యక్రమాలు చేపడుతుండటం అభినందనీయమని పేర్కొన్నారు. ఈ పథకం గ్రామంలో సానుకూల వాతావరణాన్ని సృష్టిస్తుందని అభిప్రాయపడ్డారు.
కాల్వతండాలో ప్రారంభమైన ఈ ‘ప్రైవేట్ కళ్యాణ లక్ష్మి’ పథకం, స్థానికంగా గ్రామంలోని ప్రజల మధ్య చర్చనీయాంశంగా మారింది. ఇలాంటి కార్యక్రమాలు గ్రామాభివృద్ధికి దోహదపడతాయని పలువురు అభిప్రాయపడ్డారు. ఈ పథకం అమలు తీరును గ్రామస్తులు నిశితంగా గమనిస్తున్నారు.
