25 కప్పులు గెలిచినా గుర్తింపు శూన్యం: బ్యాడ్మింటన్ కోచ్ నవీన్ ఆవేదన

గ్రామీణ ప్రాంతాల్లో ప్రతిభావంతులైన క్రీడాకారులకు సరైన అవకాశాలు దక్కడం లేదని, నిర్మల్ జిల్లాకు చెందిన బ్యాడ్మింటన్ కోచ్ వడ్నాల నవీన్ ఉదాహరణగా నిలుస్తున్నారు. 25 కప్పులు గెలిచి, హైదరాబాద్‌లోనూ రాణించినా ప్రభుత్వ ప్రోత్సాహం కోసం ఆయన ఎదురుచూస్తున్నారు.

ప్రతిభ ఉంటే అవకాశాలు వాటంతట అవే వస్తాయని అంటారు. కానీ గ్రామీణ ప్రాంతాల్లో ఎంతోమంది క్రీడాకారులకు ఆ అవకాశం దొరకడం లేదు. నిర్మల్ జిల్లా లోకేశ్వరం మండలం అవర్గ గ్రామానికి చెందిన బ్యాడ్మింటన్ కోచ్ వడ్నాల నవీన్ అలాంటి వారిలో ఒకరు.

ఉమ్మడి ఆదిలాబాద్ జిల్లాలో జరిగిన పలు బ్యాడ్మింటన్ పోటీల్లో సుమారు 25 కప్పులు గెలుచుకుని తన ప్రతిభను నిరూపించిన నవీన్, హైదరాబాద్‌లోని ఇండోర్ స్టేడియంలోనూ ఆడి మంచి గుర్తింపు పొందారు. ప్రస్తుతం భైంసాలో బ్యాడ్మింటన్ కోచ్‌గా సేవలందిస్తూ గ్రామీణ ప్రాంత యువతకు శిక్షణ ఇస్తున్నారు. ఆయన వద్ద శిక్షణ పొందిన పలువురు విద్యార్థులు వివిధ స్థాయి పోటీల్లో రాణిస్తున్నారు.

అయితే సొంత ప్రాంతంలో ఇండోర్ బ్యాడ్మింటన్ స్టేడియం లేకపోవడంతో ప్రతిభావంతులైన యువత సరైన శిక్షణ పొందలేకపోతున్నారు. ప్రభుత్వం నిర్మల్ భైంసా లేదా పరిసర ప్రాంతంలో ఆధునిక ఇండోర్ బ్యాడ్మింటన్ స్టేడియాన్ని ఏర్పాటు చేసి, వడ్నాల నవీన్‌కు ప్రభుత్వ కోచ్‌గా అవకాశం కల్పిస్తే గ్రామీణ యువతకు ఎంతో మేలు జరుగుతుందని స్థానికులు, క్రీడాభిమానులు కోరుతున్నారు.

తెలంగాణ ప్రభుత్వం గ్రామీణ క్రీడలకు ప్రాధాన్యత ఇస్తున్న నేపథ్యంలో వడ్నాల నవీన్ వంటి ప్రతిభావంతులను గుర్తించి ప్రోత్సహిస్తే రాష్ట్రానికి మరెంతో మంది జాతీయ, అంతర్జాతీయ స్థాయి బ్యాడ్మింటన్ క్రీడాకారులు తయారయ్యే అవకాశం ఉందని వారు అభిప్రాయపడుతున్నారు.

నిర్మల్ భైంసా ప్రాంతంలో మండలాల లో ఇండోర్ బ్యాడ్మింటన్ స్టేడియం ఏర్పాటు చేయాలి. వడ్నాల నవీన్‌కు ప్రభుత్వ బ్యాడ్మింటన్ కోచ్‌గా అవకాశం కల్పించాలి. గ్రామీణ క్రీడాకారులకు ఉచిత శిక్షణ, క్రీడా సామగ్రి అందించాలి. గ్రామీణ ప్రతిభను ప్రోత్సహించే ప్రత్యేక క్రీడా కేంద్రాలను ఏర్పాటు చేయాలి.

"మట్టిలో దాగిన మాణిక్యాలను వెలికితీస్తేనే తెలంగాణ క్రీడా రంగం మరింత ఉన్నత శిఖరాలకు చేరుకుంటుంది" అని స్థానికులు ఆకాంక్ష వ్యక్తం చేస్తున్నారు.