- గుమ్మనూరు ఎమ్మెల్యే జయరాం బెదిరింపు వ్యాఖ్యలను ఖండించిన జర్నలిస్ట్స్ డెమోక్రటిక్ రైట్స్ ఫోరం (JDRF).
- ఎమ్మెల్యే జయరాం వ్యాఖ్యలు ప్రజాస్వామ్య విరుద్ధమని ప్రధాన కార్యదర్శి మేడా శ్రీనివాస్ వ్యాఖ్య.
- విలేకరులపై బెదిరింపులు ఆగకపోతే న్యాయపరమైన చర్యలు తీసుకుంటామని హెచ్చరిక.
- జర్నలిస్టుల హక్కులను కాపాడాలని ప్రభుత్వానికి విజ్ఞప్తి.
- జయరాం పై సుమోటోగా కేసు నమోదు చేయాలని డిమాండ్.
గుమ్మనూరు ఎమ్మెల్యే జయరాం విలేకరులను బెదిరించిన తీరును తీవ్రంగా ఖండించిన జర్నలిస్ట్స్ డెమోక్రటిక్ రైట్స్ ఫోరం (JDRF) ప్రధాన కార్యదర్శి మేడా శ్రీనివాస్, ఆయనపై సుమోటోగా కేసు నమోదు చేయాలని డిమాండ్ చేశారు. ప్రజాస్వామ్యంలో విలేకరుల పని వాస్తవాలను తెలియజేయడమేనని, బెదిరింపుల ద్వారా మీడియా స్వేచ్ఛను అణగదొక్కలేరని స్పష్టం చేశారు.
గుమ్మనూరు ఎమ్మెల్యే జయరాం విలేకరులను బెదిరిస్తూ చేసిన వ్యాఖ్యలను జర్నలిస్ట్స్ డెమోక్రటిక్ రైట్స్ ఫోరం (JDRF) తీవ్రంగా ఖండించింది. ఈ మేరకు ఫోరమ్ ప్రధాన కార్యదర్శి మేడా శ్రీనివాస్ ఒక ప్రకటన విడుదల చేశారు. “వార్తలు వ్రాసే సమయంలో అన్ని కోణాల్లో పరిశీలించాల్సిన అవసరం ఉంది. కానీ ఎమ్మెల్యే జయరాం తాను వ్యతిరేకించే వార్తలు రాస్తే తాట తీస్తానంటూ బలుపు మాటలు మాట్లాడటం ప్రజాస్వామ్యానికి మచ్చ,” అని శ్రీనివాస్ పేర్కొన్నారు.
విలేకరులను బెదిరించడం అంగీకారయోగ్యం కాదని, తప్పుడు వార్తలు రాశారనే భావన ఉంటే న్యాయపరంగా వ్యవహరించాల్సిందిగా ఆయన సూచించారు. “రైలు పట్టాలపై పడుకోబెడతానంటూ జయరాం చేసిన వ్యాఖ్యలు, గతంలో ఆయన చేసిన చర్యల్ని న్యాయపరంగా సమీక్షించాలి,” అని శ్రీనివాస్ డిమాండ్ చేశారు.
జయరాం వ్యాఖ్యలపై తక్షణమే సుమోటోగా కేసు నమోదు చేసి, విచారణ జరిపించాలని కోరారు. “ప్రజాస్వామ్యంలో విలేకరుల హక్కులను కాపాడాల్సిన బాధ్యత ప్రభుత్వానిదే. న్యాయబద్ధంగా జయరాం పై చర్యలు తీసుకోవాలి, లేకపోతే జర్నలిస్టులు ఐక్యంగా పోరాటం చేస్తారు,” అని హెచ్చరించారు.
