బీఆర్‌ఎస్ కార్యకర్తల అక్రమ అరెస్టులు దౌర్భాగ్యకరం: విఠల్ రావు
అర్మూర్‌లో మీనాక్షి నటరాజన్ పాదయాత్రకు ముందు బీఆర్‌ఎస్ కార్యకర్తల అరెస్టుపై తీవ్ర విమర్శలు
మనోరంజని ప్రతినిధి, అర్మూర్ | ఆగస్టు 02
అర్మూర్ నియోజకవర్గంలో కాంగ్రెస్ పార్టీ ఇన్‌చార్జ్ మీనాక్షి నటరాజన్ పాదయాత్ర సందర్భంగా ఎలాంటి ఆందోళన జరగకముందే, బీఆర్‌ఎస్ కార్యకర్తలను ముందస్తుగా అరెస్టు చేయడాన్ని బీఆర్‌ఎస్ రాష్ట్ర కార్యదర్శి దాధన్ గారి విఠల్ రావు తీవ్రంగా ఖండించారు.
ఈ సందర్భంగా విఠల్ రావు మాట్లాడుతూ –
“ప్రజలకు ఇచ్చిన హామీలను నెరవేర్చడంలో విఫలమైన కాంగ్రెస్ ప్రభుత్వం, తాము నిర్వహించే కార్యక్రమాల్లో ఎటువంటి నిరసనలు లేకుండా సాగాలనే ఉద్దేశంతో ముందస్తుగా బీఆర్‌ఎస్ కార్యకర్తలను అరెస్టు చేయడం పూర్తిగా ప్రజాస్వామ్య విలువలకు విరుద్ధం,” అన్నారు.
అభిప్రాయ స్వేచ్ఛను హరించడమే లక్ష్యమా?
బీఆర్‌ఎస్ పార్టీ శాంతియుతంగా తన అభిప్రాయాన్ని వ్యక్తం చేయడానికి హక్కు కలిగి ఉందని, ఎలాంటి ఆందోళన జరగకముందే అరెస్టులు చేయడం ద్వారా కాంగ్రెస్ పార్టీ ప్రజల తీర్పు పట్ల భయభ్రాంతులుగా ఉందని ఆయన వ్యాఖ్యానించారు.
వెంటనే విడుదల చేయాలి
ఈ అక్రమ అరెస్టులను తక్షణమే నిలిపివేయాలని, ఇప్పటికే అరెస్టయిన బీఆర్‌ఎస్ కార్యకర్తలను వెంటనే విడుదల చేయాలని విఠల్ రావు డిమాండ్ చేశారు. ప్రభుత్వం కక్షపూరితంగా వ్యవహరిస్తే ప్రజలు తగిన గుణపాఠం చెప్తారని హెచ్చరించారు.
