*“ (మనోరంజని తెలుగు టైమ్స్) జూలై 22
పేదరికం అడ్డంకి కాదని, ప్రతిభతో ఐఐటీ జమ్మూలో సివిల్ ఇంజనీరింగ్లో సీటు సాధించిన కే. దీపిక, తన ఉన్నత విద్యను కొనసాగించేందుకు ఆర్థిక సహాయం కోసం ఎదురుచూస్తోంది. కడ్తాల్ మండలం అన్మాస్పల్లి గ్రామానికి చెందిన దీపిక కుటుంబం, తల్లి రోజువారీ కూలీపై ఆధారపడి జీవనం సాగిస్తోంది.
పేదరికం చదువుకు అడ్డంకి కాకూడదనే ఆశతో, ప్రతిభ ఉన్న ప్రతి విద్యార్థి ఉన్నత శిఖరాలను అధిరోహించాలనే లక్ష్యంతో ముందుకు సాగుతున్న ఓ నిరుపేద విద్యార్థినికి ప్రస్తుతం ఆర్థిక ఇబ్బందులు అడ్డంకిగా మారాయి. ప్రతిభతో ఐఐటీ జమ్మూలో సివిల్ ఇంజనీరింగ్లో సీటు సాధించిన కే. దీపిక, తన చదువును కొనసాగించేందుకు దాతల సహాయం కోసం ఎదురుచూస్తోంది.
కడ్తాల్ మండలం అన్మాస్పల్లి గ్రామానికి చెందిన కే. దీపిక, చిన్నతనంలోనే తండ్రిని కోల్పోయింది. తల్లి, అక్కతో కలిసి పెరుగుతున్న ఆమె కుటుంబానికి పెద్ద దిక్కుగా ఉండాల్సిన తండ్రి సుమారు 15 ఏళ్ల క్రితమే మృతి చెందారు. తల్లి రోజువారీ కూలీ పనులు చేస్తూ పిల్లలను చదివిస్తూ కుటుంబాన్ని పోషిస్తోంది. దీపిక తెలంగాణ సాంఘిక సంక్షేమ గురుకుల విద్యాలయాల సంస్థ (TGSWREIS) పరిధిలోని కమ్మదనం గురుకుల పాఠశాలలో ఇంటర్మీడియట్ MPC చదివి, తన ప్రతిభతో ఐఐటీ జమ్మూలో సివిల్ ఇంజనీరింగ్ కోర్సులో సీటు సాధించింది. ఇది ఆమె కుటుంబానికే కాకుండా, గ్రామానికి కూడా గర్వకారణంగా నిలిచింది.
అయితే, ఐఐటీలో చదువుకోవడానికి అవసరమైన ఖర్చులను భరించే ఆర్థిక స్థోమత కుటుంబానికి లేకపోవడంతో దీపిక ఉన్నత విద్య ప్రశ్నార్థకంగా మారింది. తల్లి రోజువారీ కూలీగా పనిచేస్తూ కుటుంబాన్ని పోషిస్తుండటంతో, కుమార్తె చదువు కోసం అయ్యే భారీ ఖర్చులను భరించడం తన వల్ల కాదని ఆవేదన వ్యక్తం చేస్తోంది. 'ఎన్ని కష్టాలు ఎదురైనా నేను చదువుకుంటాను.. నా భవిష్యత్తును నేను నిర్మించుకోవాలనుకుంటున్నాను' అంటూ దీపిక తన చదువుపై ఉన్న పట్టుదలను వ్యక్తం చేస్తోంది.
ఎస్సీ సామాజిక వర్గానికి చెందిన ఈ నిరుపేద విద్యార్థిని ప్రతిభను గుర్తించి, ఆమెకు ఆర్థిక సహాయం అందించేందుకు దాతలు, స్వచ్ఛంద సంస్థలు, సేవా సంస్థలు, విద్యాభిమానులు ముందుకు రావాలని పలువురు విజ్ఞప్తి చేస్తున్నారు. ఒక చిన్న సహాయం ఈ విద్యార్థిని జీవితాన్ని మార్చడమే కాకుండా, భవిష్యత్తులో ఉన్నత స్థాయికి ఎదిగి మరెందరికో స్ఫూర్తిగా నిలిచే అవకాశం కల్పిస్తుందని కోరుతున్నారు. దీపిక ఐఐటీ చదువు కొనసాగించేందుకు మీ వంతు సహాయం అందించాలని మానవతావాదులు విజ్ఞప్తి చేస్తున్నారు. సహాయం అందించేందుకు ఫోన్పే / గూగుల్పే: 📞 9908186333.
“ఒక ప్రతిభావంతురాలైన విద్యార్థిని చదువుకు మనం అందించే చేయూత.. ఆమె జీవితానికి అందించే వెలుగవుతుంది.”
