ఇటీవల విడుదలైన పదవ తరగతి పరీక్షా ఫలితాల్లో అత్యుత్తమ ప్రతిభ కనబరిచిన ప్రభుత్వ బాలికల ఉన్నత పాఠశాల విద్యార్థినులను చేయూత ఫౌండేషన్ ఆధ్వర్యంలో ఘనంగా సన్మానించారు. ప్రశంసా పత్రాలు, శాలువాలతో వారిని గౌరవించారు.
నాగర్కర్నూల్: చేయూత వెల్ఫేర్ అసోసియేషన్ ఫౌండేషన్ కార్యాలయంలో మంగళవారం (మే 5, 2026) జరిగిన ఈ కార్యక్రమంలో, పదవ తరగతిలో ఉత్తమ మార్కులు సాధించిన ముగ్గురు విద్యార్థినులు ఎం. శివరాణి, సానియా బేగం, జె. దీపికలను ఫౌండేషన్ అధ్యక్షులు ఏటిగడ్డ శ్రీనివాసులు, వర్కింగ్ ప్రెసిడెంట్ దేవరపాగ రామచందర్, ప్రధాన కార్యదర్శి గుర్రం శ్రీకాంత్ ఘనంగా సత్కరించారు.
ఈ కార్యక్రమానికి ముఖ్య అతిథులుగా హాజరైన నాగర్ కర్నూల్ మండల విద్యాధికారి (ఎంఈఓ) డొక్కా కురుమయ్య, ఎంఈఎఫ్ జిల్లా అధ్యక్షులు దేవరపాగ ప్రభాకర్, చేయూత ఫౌండేషన్ చేపడుతున్న సేవా కార్యక్రమాలను కొనియాడారు. విద్యార్థుల భవిష్యత్తుకు విద్య ఎంత ముఖ్యమో వివరించారు.
ఎంఈఓ డొక్కా కురుమయ్య మాట్లాడుతూ, విద్య ద్వారానే అన్ని సమస్యలకు పరిష్కారం లభిస్తుందని, ఆర్థిక అసమానతలను తొలగించుకోవచ్చని విద్యార్థినులకు తెలిపారు. మంచి చదువుతో ఉన్నత శిఖరాలను అధిరోహించవచ్చని ఆయన ఆశాభావం వ్యక్తం చేశారు.
ఎంఈఎఫ్ జిల్లా అధ్యక్షులు దేవరపాగ ప్రభాకర్ కూడా చేయూత ఫౌండేషన్ చేస్తున్న కృషిని అభినందించారు. ఈ కార్యక్రమంలో ఫౌండేషన్ కార్యవర్గ సభ్యులు, మంజుల టీచర్ పాల్గొన్నారు.
