తెలంగాణ పంచాయతీ ఎన్నికలపై బిగ్‌ అప్‌డేట్.. సెప్టెంబర్ 2వ తేదీన..!
తెలంగాణలో సెప్టెంబర్ 30వ తేదీలోపు పంచాయతీ ఎన్నికలు నిర్వహించాలని.. రాష్ట్ర హైకోర్టు ఇచ్చిన ఆదేశాలకు అనుగుణంగా రాష్ట్ర ఎన్నికల సంఘం.. ఎన్నికల నిర్వహణ ప్రక్రియను ముమ్మరం చేసింది.
వీలైనంత త్వరగా పంచాయతీ ఎన్నికలను నిర్వహించాలని భావిస్తున్న ఎన్నికల సంఘం.. దానికి సంబంధించిన చర్యలను చేపడుతోంది. ఇందులో భాగంగానే ఓటర్ జాబితా సవరణకు సంబంధించిన షెడ్యూల్ రిలీజ్ చేసింది. రాష్ట్రంలోని అన్ని గ్రామ పంచాయతీలకు ఎన్నికలు నిర్వహించేందుకు పోలింగ్ కేంద్రాలు, తుది ఓటర్ల జాబితా విడుదలకు సంబంధించిన నోటిఫికేషన్‌ను రాష్ట్ర ఎన్నికల సంఘం తాజాగా విడుదల చేసింది.
జిల్లా పంచాయతీ అధికారులు.. వచ్చే నెల (సెప్టెంబర్) 2వ తేదీ నాటికి అన్ని గ్రామ పంచాయతీల్లో ఫొటో ఓటర్ల తుది జాబితాను సిద్ధం చేయనున్నట్లు తాజాగా విడుదల చేసిన ఉత్తర్వుల్లో రాష్ట్ర ఎన్నికల సంఘం అధికారులు వెల్లడించారు. ఈనెల 28వ తేదీన వార్డులు, పంచాయతీల వారీగా ఓటర్ లిస్ట్‌ను విడుదల చేయనున్నట్లు తెలిపారు.
ఆ తర్వాత ఈ నెల 29వ తేదీన జిల్లా స్థాయిలో.. 30వ తేదీన మండల స్థాయిలో అన్ని రాజకీయ పార్టీలతో రాష్ట్ర ఎన్నికల సంఘం అధికారులు సమావేశాన్ని నిర్వహించనున్నారు. ఇక ఓటర్ జాబితాకు సంబంధించి.. ఈనెల 28వ తేదీ నుంచి 30వ తేదీ వరకు అభ్యంతరాలను స్వీకరించనున్నారు. ఈ ప్రక్రియ పూర్తి అయిన తర్వాత చివరగా.. సెప్టెంబర్ 2వ తేదీన ఓటర్ల తుది జాబితాను విడుదల చేయనున్నట్లు ఎన్నికల సంఘం తాజాగా స్పష్టం చేసింది.
తెలంగాణలో సర్పంచుల పదవీకాలం 2024 జనవరి 31వ తేదీనే ముగిసింది. దీంతో గ్రామాల్లో సర్పంచ్‌ల చెక్ పవర్ పోయి.. పంచాయతీ కార్యదర్శుల ఆధ్వర్యంలో పాలన సాగుతోంది. అయితే గ్రామాల్లో సర్పంచ్‌ల పదవీ కాలం ముగిసి ఒకటిన్నరేళ్లు పూర్తి అయినా పలు కారణాలతో ఎన్నికల నిర్వహణ ముందుకు సాగలేదు.
ఈ క్రమంలోనే తెలంగాణలో స్థానిక సంస్థల ఎన్నికలపై హైకోర్టులో దాఖలైన పిటిషన్లను విచారించిన ధర్మాసనం.. జూన్ 25వ తేదీన తుది తీర్పును వెలువరించింది. 3 నెలల్లోగా గ్రామ పంచాయతీ ఎన్నికలను నిర్వహించాలని కీలక తీర్పును ఇచ్చింది. ఈ నేపథ్యంలోనే వీలైనంత త్వరగా 30 రోజుల్లో వార్డుల విభజనను పూర్తి చేసి.. ఎన్నికలు నిర్వహించాలని తెలంగాణ ప్రభుత్వంతోపాటు రాష్ట్ర ఎన్నికల సంఘానికి సూచించింది
