భైంసా యువ ముత్యాలు — పేదరికం అడ్డంకి కాదు, కృషి ఉంటే కలలు నిజమవుతాయి!

భైంసా యువ ముత్యాలు — పేదరికం అడ్డంకి కాదు, కృషి ఉంటే కలలు నిజమవుతాయి!

 

• TMREIS మైనార్టీ గురుకులం విద్యార్థులు మొహమ్మద్ కైఫ్, మొహమ్మద్ దానిష్ ఎంబీబీఎస్ సీట్లు సాధించారు

• భైంసా పట్టణానికి గర్వకారణం

• పేదరికం కంటే పట్టుదలే విజయ రహస్యం అని నిరూపించిన యువ ముత్యాలు

భైంసా మైనార్టీ గురుకులం విద్యార్థులు మొహమ్మద్ కైఫ్, మొహమ్మద్ దానిష్ ప్రభుత్వ ఎంబీబీఎస్ సీట్లు సాధించి భైంసాకు గర్వకారణమయ్యారు. TMREIS గురుకుల పాఠశాలల్లో చదివిన ఈ ఇద్దరూ పేదరికాన్ని అడ్డంకిగా కాకుండా ప్రేరణగా తీసుకుని విజయం సాధించారు. తమ విజయానికి తల్లిదండ్రులు, గురువులు, ప్రభుత్వం కారణమని కృతజ్ఞతలు తెలిపారు.

భైంసా, అక్టోబర్ 16:

“పరిస్థితులు కాదు, పట్టుదలే విజయానికి దారి చూపుతుంది” — ఈ సత్యాన్ని సాక్షాత్కరించిన ఇద్దరు యువ ముత్యాలు భైంసా పట్టణానికి గర్వకారణమయ్యారు. తెలంగాణ మైనారిటీల రెసిడెన్షియల్ ఎడ్యుకేషనల్ ఇన్‌స్టిట్యూషన్స్ సొసైటీ (TMREIS) గురుకుల విద్యార్థులు మొహమ్మద్ కైఫ్ మరియు మొహమ్మద్ దానిష్ ప్రభుత్వ ఉచిత ఎంబీబీఎస్ సీట్లు సాధించి, పేదరికం కంటే కృషి గొప్పదని నిరూపించారు.

మొహమ్మద్ కైఫ్ తండ్రి అబ్దుల్ రౌఫ్ సాధారణ జీవనోపాధి చేసుకుంటూ తన కుమారుడు చదువులో ఉన్నత స్థానానికి చేరుకోవాలని ప్రోత్సహించారు. వింగ్స్ హైస్కూల్ భైంసాలో ప్రాథమిక విద్య, TMREIS బాయ్స్ భైంసాలో హైస్కూల్, TMREIS బర్కాస్ హైదరాబాద్‌లో ఇంటర్మీడియట్ పూర్తి చేసిన కైఫ్ చిన్నప్పటి నుంచే కార్డియాలజిస్ట్ కావాలన్న కలతో కృషి చేశాడు.

మరొక విజేత మొహమ్మద్ దానిష్ (తండ్రి అబ్దుల్ సత్తార్), నర్సరీ నుంచి 7వ తరగతి వరకు సుఫ్ఫా మోడల్ స్కూల్ భైంసా, 8వ నుండి 10వ తరగతి వరకు వాసవి హైస్కూల్ భైంసా, ఇంటర్మీడియట్‌ను TMREIS బాయ్స్–1 భైంసాలో పూర్తి చేశాడు. పేదరికాన్ని తన విజయానికి అడ్డంకిగా కాకుండా ఇంధనంగా మార్చుకున్నాడు.

ఇద్దరూ మాట్లాడుతూ, “మేము పేద కుటుంబాలవాళ్ళం కానీ కలలను పెద్దగా కనడంలో భయం పెట్టుకోలేదు. ప్రభుత్వం ఇచ్చిన అవకాశాన్ని సద్వినియోగం చేసుకుంటే ఎవరైనా విజయాన్ని సాధించగలరు” అన్నారు.

వారు తోటి విద్యార్థులకు “నమ్మకం ఉంచుకోండి, కష్టపడండి, పరిస్థితులు కాదు — కృషే భవిష్యత్తును నిర్ణయిస్తుంది” అని స్పూర్తిదాయక సందేశం ఇచ్చారు.

స్థానిక ప్రజలు, ఉపాధ్యాయులు, సామాజిక వేత్తలు వీరిని హాట్సాఫ్ చెబుతూ అభినందించారు. “ఇలాంటి విద్యార్థులు సమాజానికి ఆదర్శం — కష్టాలు ఉన్నా విద్యతో జీవితం మారుతుందనే సజీవ సాక్ష్యం వీరు” అని ప్రశంసించారు.