కాంగ్రెస్పై విమర్శలు రాజకీయ లబ్ధికే: ఆదివాసీ కాంగ్రెస్ నేత గోవింద్ నాయక్
బీజేపీ, బీఆర్‌ఎస్ విమర్శలు అప్రాసంగికం – బీసీలకు 42% రిజర్వేషన్లు అందించడమే నిజమైన అభివృద్ధి
నిర్మల్, జూలై 29 (M4News):
తెలంగాణ రాష్ట్రంలో కాంగ్రెస్ ప్రభుత్వం చేపడుతున్న ప్రజా ప్రయోజన చర్యలపై బీజేపీ, బీఆర్‌ఎస్ పార్టీలు కావాలని విమర్శలు చేస్తోన్నట్లు ఆదివాసీ కాంగ్రెస్ నిర్మల్ జిల్లా చైర్మన్ బాణావత్ గోవింద్ నాయక్ విమర్శించారు. రాజకీయ లబ్ధి కోసమే ఈ విమర్శలు కొనసాగుతున్నాయని ఆయన అన్నారు.
కేటీఆర్ విమర్శలపై స్పందన:
మేడిగడ్డ ప్రాజెక్టుకు సంబంధించిన సమస్యలపై కేటీఆర్ చేసిన వ్యాఖ్యలు పూర్తిగా తప్పుబట్టదగ్గవని గోవింద నాయక్ స్పష్టం చేశారు. గత పాలనలో జరిగిన అవ్యవస్థను ఇప్పుడు కాంగ్రెస్ ప్రభుత్వంపై మోపే ప్రయత్నం చేస్తుండటం హాస్యాస్పదమన్నారు. ఇటీవల కేటీఆర్ ఒక సామాజిక వర్గంపై బూతులాడిన వీడియో వెలుగులోకి వచ్చిన నేపథ్యంలో ఆయనకు విమర్శల అర్హత లేదన్నారు.
బీసీ రిజర్వేషన్లపై వివరణ:
బీసీల అభివృద్ధికి 42 శాతం రిజర్వేషన్లు కల్పిస్తూ కాంగ్రెస్ ప్రభుత్వం అసెంబ్లీలో తీర్మానం చేసి, పార్లమెంట్‌కు పంపిందని గుర్తుచేశారు. దీనిపై భాజపా నేతలు, ముఖ్యంగా బండి సంజయ్ వంటి నాయకులు తప్పుదారి పట్టించేలా మాట్లాడటం దురుద్దేశంతో కూడిన చర్య అని విమర్శించారు. ముస్లింలకు లబ్ధి చేకూరుతుందని ప్రచారం చేయడం అబద్ధమని తేల్చారు.
యూరియా అంశంపై స్పష్టత:
రాష్ట్రంలోని రైతులకు యూరియా అందుబాటులో ఉండకపోతే కాంగ్రెస్ ప్రభుత్వం తీవ్ర చర్యలు తీసుకుంటుందని గోవింద నాయక్ హామీ ఇచ్చారు. బీజేపీ నేత రామచంద్రరావు చేసిన యూరియా బ్లాక్ మార్కెటింగ్ ఆరోపణలను ఖండించారు. ఇది పూర్తిగా అపప్రచారమని, రాష్ట్ర ప్రభుత్వం రైతుల పక్షాన నిలిచిందన్నారు.
