మార్కాపురం, 2026-08-21
పూల సుబ్బయ్య వెలిగొండ ప్రాజెక్టు కోసం భూములు కోల్పోయిన నిర్వాసితులు తమ సమస్యలను ప్రభుత్వం పట్టించుకోవడం లేదని ఆరోపిస్తున్నారు. ప్యాకేజీల అమలులో జాప్యం, అర్హత ఉండి కూడా పేర్లు లేకపోవడం, భూములు, ఇళ్లకు పరిహారం అందకపోవడం వంటి సమస్యలతో తీవ్ర ఇబ్బందులు పడుతున్నామని బాధితులు వాపోతున్నారు.
పూల సుబ్బయ్య వెలిగొండ ప్రాజెక్టు కోసం త్యాగాలు చేసి, సర్వం కోల్పోయిన నిర్వాసితులను ప్రభుత్వమే భయభ్రాంతులకు గురిచేస్తోందని బాధితులు ఆరోపించారు. ప్యాకేజీతో పాటు ఎన్నో సమస్యలు పెండింగ్లో ఉంచి, వెలిగొండ ప్రాజెక్టు పూర్తయిందని, నీటిని విడుదల చేస్తామని, గ్రామాలు ఖాళీ చేయాలని ప్రభుత్వం ఒత్తిడి చేయడం దుర్మార్గమని నిర్వాసితులు ఆవేదన వ్యక్తం చేశారు.
ప్యాకేజీ అమలులో జాప్యం
వెలిగొండ ప్రాజెక్టు పరిధిలోని 11 ముంపు గ్రామాలలో సుమారు పదివేల కుటుంబాలు ప్యాకేజీకి అర్హత కలిగి ఉన్నాయి. వారందరికీ పునరావాసం కల్పించాల్సిన బాధ్యత ప్రభుత్వంపై ఉంది. అయితే, 2019 కటాఫ్ తేదీ ప్రకారం, అప్పటి వరకు గుర్తించిన 7,321 మంది నిర్వాసితులకు మాత్రమే రూ. 900.56 కోట్లు ఇస్తున్నట్లు ప్రభుత్వం చెబుతోంది. ఇప్పటివరకు రూ. 518 కోట్లు ప్యాకేజీ కింద అందజేయడం జరిగింది. మిగిలిన ప్యాకేజీ మొత్తాన్ని ఈ వారంలో ఇస్తామని ప్రభుత్వం చెబుతోంది.
పేర్లు లేనివారు, అర్హత ఉన్నా పరిహారం రానివారు
2019 నుంచి 2026 ఆగస్టు నాటికి 18 ఏళ్లు నిండిన యువత 1500 సంఖ్య దాటనుంది. 11 ముంపు గ్రామాలలో అర్హత ఉండి, ఆర్అండ్ఆర్ ప్యాకేజీలో పేర్లు లేనివారు, పేర్లు తప్పుల తడకగా ఉన్నవారు మరో పన్నెండు వందల పైచిలుకు నిర్వాసితులు ఉన్నారు. అర్హత ఉండి, ఆర్అండ్ఆర్ ప్యాకేజీలో పేర్లు లేని వారిలో అత్యధికంగా కలనూతల ముంపు గ్రామంలో ఉన్నట్లు తెలిసింది. ఆ ఒక్క గ్రామంలోనే పేర్లు లేని వారి సంఖ్య 250కి పైగా ఉన్నట్లు సమాచారం. ఇదిలా ఉండగా, నేటికీ కొందరు భూములకు పరిహారం అందలేదు. కొన్ని భూములకు చుక్కలు, అసైన్డ్ అంటూ అధికారులు కొర్రీలు వేయడంతో, వాటికి పరిహారం అందాల్సిన వారు అధిక సంఖ్యలో ఉన్నారు. దీంతోపాటు కొందరు గృహాలకు కూడా పరిహారం అందలేదు.
గ్రామాలు ఖాళీ చేయాలనే ఒత్తిడి
ఒకవైపు ప్రాజెక్టు నీటిని విడుదల చేస్తామని చెబుతూనే, మరోవైపు గ్రామాలు ఖాళీ చేయాలని మౌఖిక ఆదేశాలు ఇవ్వడం నిర్వాసితులను భయాందోళనలకు గురిచేస్తోంది. ఆర్థికపరమైన అనేక సమస్యలు పరిష్కరించకుండా తమను గ్రామాలు ఖాళీ చేయాలంటే కుదిరే పని కాదని నిర్వాసితులు తెగేసి చెబుతున్నారు. 18 ఏళ్లు నిండిన యువతీ యువకుల విషయంలో ప్రభుత్వం నేటికీ స్పష్టత ఇవ్వలేదు. ఇలాంటి సమస్యలను ఎప్పుడో పరిష్కరించాల్సిన ప్రభుత్వం మూడు దశాబ్దాలుగా నానబెట్టింది. గ్రామాలు ఖాళీ చేసి బయటకు వచ్చిన తర్వాత తమ సమస్యలు పరిష్కారమవుతాయనే నమ్మకం తమకు లేదని నిర్వాసితులు వాపోతున్నారు.
ప్రారంభోత్సవంపై స్వాగతం, సమస్యల పరిష్కారంపై విన్నపం
ప్రాజెక్టు ప్రారంభోత్సవాన్ని తాము స్వాగతిస్తున్నామని, ఇదే క్రమంలో తమ సమస్యలు కూడా పరిష్కరించాలని ప్రభుత్వానికి విన్నవించుకుంటున్నామని, అయితే పట్టించుకునే వారు మాత్రం లేరని వాపోతున్నారు. ప్రభుత్వం ఇలాగే మొండిగా వ్యవహరిస్తే, తాము కూడా ఇంతకంటే రెట్టింపుగా మొండిగా వ్యవహరించక తప్పదని నిర్వాసితులు హెచ్చరిస్తున్నారు.
