కుంటాల మండలంలోని వెంకుర్ గ్రామంలో 2010లో నిర్మించి, అదే సంవత్సరం తెగిపోయిన చెరువు మరమ్మత్తులు చేపట్టాలని, భూములు కోల్పోయిన రైతులకు నష్టపరిహారం అందించాలని స్థానిక రైతులు ప్రభుత్వాన్ని కోరుతున్నారు. ఏళ్లు గడుస్తున్నా చెరువు సమస్య పరిష్కారం కాకపోవడంతో ప్రతి ఏటా పంట నష్టపోతున్నామని వారు ఆవేదన వ్యక్తం చేస్తున్నారు.
2007లో ప్రారంభమై 2010లో పూర్తయిన వెంకుర్ చెరువు, అదే సంవత్సరం అధిక వర్షాలకు నాణ్యత లోపంతో కొట్టుకుపోయింది. అప్పటి నుంచి నేటి వరకు చెరువు అలుగు పూర్తిస్థాయిలో మరమ్మత్తులకు నోచుకోలేదు. దీంతో అందాకూరు, పెంచికల్పాడు, కల్లూరు వాగు పరిసరాల్లోని వ్యవసాయ భూములు ప్రతి వర్షాకాలంలో ముంపునకు గురవుతున్నాయి.
చెరువు నిర్మాణం వల్ల భూగర్భ జలాలు పెరగడం, మత్స్య సంపద వృద్ధి చెందడం, వన్యప్రాణులకు నీటి వసతి కల్పించడం వంటి ప్రయోజనాలు ఉంటాయని విద్యావంతులు తెలిపారు. ఈ నేపథ్యంలో చెరువును పునరుద్ధరించడం అత్యవసరం.
చెరువు నిర్మాణంలో తమ భూములను కోల్పోయిన రైతులకు ఇప్పటివరకు ఎలాంటి పరిహారం అందలేదని బాధితులు పేర్కొంటున్నారు. ప్రభుత్వం తమ సమస్యలను వెంటనే పరిష్కరించాలని వారు విజ్ఞప్తి చేస్తున్నారు.
రైతుల దీర్ఘకాలిక సమస్యను పరిష్కరించడానికి వెంకుర్ చెరువు మరమ్మత్తు పనులను తక్షణమే చేపట్టాలని, భూములు కోల్పోయిన రైతులకు న్యాయం చేయాలని స్థానికులు డిమాండ్ చేస్తున్నారు.
