తిరుమలగిరి సాగర్, 4 August
తిరుమల తిరుపతి దేవస్థానం (టీటీడీ) పసి పిల్లల తల్లిదండ్రులకు ఒక శుభవార్తను అందించింది. ఇకపై శిశువులతో వచ్చే తల్లిదండ్రులు కేవలం 40 నిముషాల్లోనే శ్రీవారిని దర్శించుకునేలా ప్రత్యేక సౌకర్యాన్ని అందుబాటులోకి తెచ్చింది.
తిరుమల శ్రీవారిని దర్శించుకోవడానికి భక్తులు గంటల తరబడి వేచి చూడాల్సి వస్తుందన్నది అందరికీ తెలిసిన విషయమే. అయితే, తిరుమల తిరుపతి దేవస్థానం (టీటీడీ) తాజాగా ఒక ప్రత్యేక సౌకర్యాన్ని అందుబాటులోకి తెచ్చింది. దీని ద్వారా పసి పిల్లల తల్లిదండ్రులు కేవలం 40 నిముషాల్లోనే శ్రీవారిని దర్శించుకునే అవకాశం కల్పించింది.
ఈ 'శిశు దర్శనం' సౌకర్యం ఎటువంటి రుసుము లేకుండా, ఆన్లైన్ బుకింగ్ టోకెన్లు అవసరం లేకుండానే పొందవచ్చు. ఈ దర్శనానికి వెళ్లే దంపతులకు ఒక సంవత్సరం లోపు వయస్సు గల పిల్లలు ఉండాలి. చిన్నారితో పాటు తల్లిదండ్రులకు కూడా దర్శనానికి అనుమతిస్తారు. ఒకవేళ వారికి 12 ఏళ్ల లోపు పిల్లలు ఉంటే, వారిని కూడా అనుమతిస్తారు.
ప్రతిరోజూ మధ్యాహ్నం 12 గంటల నుంచి సాయంత్రం 6 గంటల లోపు 'సుపథం' మార్గం ద్వారా భక్తులను లోపలికి అనుమతిస్తారు. ఇందుకోసం సుపథం వద్దకు వెళ్లి, శిశువు బర్త్ సర్టిఫికెట్ లేదా హాస్పిటల్ డిశ్చార్జీ సమ్మరీ లెటర్ చూపించాల్సి ఉంటుంది. ఈ సౌకర్యానికి కొన్ని షరతులు వర్తిస్తాయి.
టీటీడీ నిబంధనల ప్రకారం, భక్తులు సంప్రదాయ దుస్తులు ధరించాలి మరియు దర్శనం 40 నిముషాల్లో పూర్తి చేసుకోవాలి. భక్తుల రద్దీ ఎక్కువగా ఉండే అవకాశం ఉన్నందున, సుపథం వద్దకు ఎంత త్వరగా చేరుకుంటే అంత మంచిదని సూచించారు. శిశువుకు ఇబ్బంది కలగకుండా పాలు, డైపర్స్, మంచి నీళ్లు వంటివి తీసుకెళ్లడానికి అనుమతి ఉంది.
ఈ సౌకర్యం గురించి పూర్తి వివరాల కోసం టీటీడీ హెల్ప్ లైన్ నెంబర్ 0877-2233333 కు కాల్ చేయాలని అధికారులు తెలిపారు.
