దేశవ్యాప్తంగా ఉన్న హైకోర్టులకు సుప్రీంకోర్టు కీలక మార్గదర్శకాలను జారీ చేసింది. కేసుల విచారణ పూర్తయి, తీర్పు రిజర్వ్ చేసిన మూడు నెలలలోపు తప్పనిసరిగా తీర్పు వెలువరించాలని సుప్రీంకోర్టు స్పష్టం చేసింది. తీర్పుల వెల్లడిలో జరుగుతున్న ఆలస్యాన్ని అరికట్టేందుకు రాజ్యాంగం కల్పించిన అధికారాన్ని వినియోగించినట్లు సుప్రీంకోర్టు తెలిపింది.
రాజ్యాంగంలోని ఆర్టికల్ 142 కింద తనకు గల అసాధారణ అధికారాలను ఉపయోగించి, దేశంలోని అన్ని హైకోర్టులు కచ్చితంగా పాటించాల్సిన మార్గదర్శకాలను సుప్రీంకోర్టు శుక్రవారం జారీ చేసింది. 'జస్టిస్ డిలేడ్ ఈజ్ జస్టిస్ డినైడ్' అనే సూత్రాన్ని మరోసారి గుర్తు చేస్తూ ఈ ఆదేశాలు వెలువడ్డాయి.
బెయిల్ ఉత్తర్వులను వీలైనంత వరకు మరుసటి రోజే ప్రకటించాలని, అదే రోజున జైలుకు పంపాలని ఆదేశించింది. బెయిల్ మంజూరైన అండర్ ట్రయల్ ఖైదీలను అదే రోజు లేదా మరుసటి రోజు లోగా విడుదల చేయాలని తెలిపింది. తీర్పు రిజర్వ్ చేసిన తేదీని హైకోర్టు వెబ్సైట్లో స్పష్టంగా ప్రదర్శించాలని సూచించింది.
కోర్టులో ముఖ్యాంశం ప్రకటించిన ఏడు రోజుల్లోగా పూర్తి కారణాలతో కూడిన తీర్పును అప్లోడ్ చేయాలని ఆదేశించింది. 30 రోజుల్లోగా తీర్పు కారణాలను వెబ్సైట్లో పొందుపరచకపోతే, ఆ కేసును వేరే కొత్త బెంచ్కు బదిలీ చేసే అవకాశం ఉందని తెలిపింది. ఈ ఉత్తర్వులను అన్ని హైకోర్టుల ప్రధాన న్యాయమూర్తుల ముందు ఉంచాలని రిజిస్ట్రార్ జనరల్స్కు సుప్రీంకోర్టు ఆదేశాలు జారీ చేసింది.
ఆలస్యమైన తీర్పు అనేది న్యాయం కాదని ధర్మాసనం అభిప్రాయపడింది. ఈ మార్గదర్శకాల అమలు తీర్పుల ప్రక్రియలో పారదర్శకతను, వేగాన్ని పెంచుతుందని భావిస్తున్నారు.
