తానూర్, జులై 22
వన మహోత్సవం–2026లో భాగంగా నిర్మల్ జిల్లా ఎస్పీ డా. జి. జానకి షర్మిల, ఐపీఎస్ బుధవారం మహారాష్ట్ర సరిహద్దులోని తానూర్ పోలీస్ స్టేషన్ను సందర్శించి వార్షిక తనిఖీ నిర్వహించారు. ఈ సందర్భంగా పాఠశాల విద్యార్థులతో కలిసి సుమారు 300 మొక్కలు నాటారు. పర్యావరణ పరిరక్షణ ప్రతి ఒక్కరి సామాజిక బాధ్యత అని, ప్రతి విద్యార్థి కనీసం ఒక మొక్కను నాటి దానిని సంరక్షించాలని ఎస్పీ సూచించారు.
వన మహోత్సవం–2026లో భాగంగా నిర్మల్ జిల్లా ఎస్పీ డా. జి. జానకి షర్మిల, ఐపీఎస్ బుధవారం మహారాష్ట్ర సరిహద్దులోని తానూర్ పోలీస్ స్టేషన్ను సందర్శించి వార్షిక తనిఖీ నిర్వహించారు. ఈ సందర్భంగా పాఠశాల విద్యార్థులతో కలిసి సుమారు 300 మొక్కలు నాటారు. విద్యార్థులను ఉద్దేశించి ఎస్పీ మాట్లాడుతూ పర్యావరణ పరిరక్షణ ప్రతి ఒక్కరి సామాజిక బాధ్యత అని, ప్రతి విద్యార్థి కనీసం ఒక మొక్కను నాటి దానిని సంరక్షించాలని సూచించారు. మొక్కలను నాటడమే కాకుండా వాటిని పరిరక్షించినప్పుడే వన మహోత్సవం లక్ష్యం నెరవేరుతుందన్నారు.
అనంతరం పోలీస్ స్టేషన్లో పరిపాలన, శాంతిభద్రతలు, నేర నియంత్రణ చర్యలు, రికార్డుల నిర్వహణ, కమ్యూనిటీ పోలీసింగ్, బీట్ వ్యవస్థ, సీసీ కెమెరాల పనితీరు, మాల్ఖానా, ఆయుధాగారం, పోలీసు వాహనాలు, దర్యాప్తు పురోగతిని సమగ్రంగా పరిశీలించి అధికారులకు పలు సూచనలు చేశారు.
మహారాష్ట్ర సరిహద్దులో ఉన్న తానూర్ పోలీస్ స్టేషన్కు వ్యూహాత్మక ప్రాధాన్యం ఉందని పేర్కొన్న ఎస్పీ, అంతర్రాష్ట్ర నేరాల నియంత్రణపై అప్రమత్తంగా ఉండాలని ఆదేశించారు. చెక్పోస్టుల వద్ద కట్టుదిట్టమైన వాహన తనిఖీలు నిర్వహించి అక్రమ మద్యం, గంజాయి, మాదకద్రవ్యాలు, పశువుల అక్రమ రవాణాను అరికట్టాలని సూచించారు. అలాగే మహారాష్ట్ర పోలీసులతో సమన్వయాన్ని బలోపేతం చేసి నేరస్తుల కదలికలపై నిరంతర నిఘా ఉంచాలని ఆదేశించారు.
మహిళలు, చిన్నారుల భద్రతకు అత్యున్నత ప్రాధాన్యం ఇవ్వాలని, సైబర్ నేరాలు, ఆన్లైన్ మోసాలు, బాల్య వివాహాలపై ప్రజలకు విస్తృత అవగాహన కల్పించాలని సూచించారు. ఆధునిక సాంకేతికతతో నాణ్యమైన దర్యాప్తు చేపట్టి శిక్షల శాతం పెరిగేలా చర్యలు తీసుకోవాలని పేర్కొన్నారు. అదేవిధంగా గంజాయి, గుడుంబా, ఇతర మాదకద్రవ్యాల నిర్మూలనపై ప్రత్యేక దృష్టి సారించాలని, కమ్యూనిటీ పోలీసింగ్ను బలోపేతం చేస్తూ గ్రామాల్లో సీసీ కెమెరాల ఏర్పాటుకు ప్రజలను ప్రోత్సహించాలని సూచించారు. పోలీస్ స్టేషన్లో పరిశుభ్రత, క్రమశిక్షణ, సమయపాలన పాటిస్తూ ప్రజలకు మెరుగైన సేవలు అందించాలని ఆదేశించారు.
ఈ కార్యక్రమంలో భైంసా ఏఎస్పీ సాయి కిరణ్, ముధోల్ సీఐ రవీంద్ర నాయక్, తానూర్ ఎస్ఐ షేక్ జుబేర్ ఖాన్, పాఠశాల విద్యార్థులు, పోలీసు అధికారులు, సిబ్బంది పాల్గొన్నారు.
