సారంగాపూర్ మండలంలో విద్యార్థుల భద్రతను దృష్టిలో ఉంచుకుని, మోటార్ వెహికల్ ఇన్స్పెక్టర్ రజనీకాంత్ నేతృత్వంలో పాఠశాల బస్సులపై ఆకస్మిక తనిఖీలు నిర్వహించారు. ఈ తనిఖీల్లో ఆర్టీఏ నిబంధనలను ఉల్లంఘించిన ఒక బస్సుపై కేసు నమోదు చేశారు.
గురువారం బీరవెల్లి, సారంగాపూర్ ప్రాంతాల్లోని విద్యాసంస్థలకు చెందిన స్కూల్ బస్సులను రజనీకాంత్ తనిఖీ చేశారు. మొత్తం ఏడు బస్సులను పరిశీలించగా, ఒక బస్సు నిబంధనలకు విరుద్ధంగా ఉన్నట్లు గుర్తించారు. బస్సుల ఫిట్నెస్, భద్రతా ప్రమాణాలు, అత్యవసర సదుపాయాలు వంటి అంశాలను అధికారులు పరిశీలించారు.
ఈ సందర్భంగా ఇన్స్పెక్టర్ రజనీకాంత్ మాట్లాడుతూ, విద్యార్థుల భద్రతకు అత్యంత ప్రాధాన్యత ఇవ్వాలని పాఠశాల యాజమాన్యాలకు సూచించారు. బస్సుల ఫిట్నెస్, అవసరమైన పత్రాలను ఎప్పటికప్పుడు సరిచూసుకోవాలని ఆదేశించారు. నిబంధనలు పాటించని వారిపై కఠిన చర్యలు తప్పవని హెచ్చరించారు.
ఈ తనిఖీల్లో ఆర్టీఏ సిబ్బంది లిఖిత్ కుమార్ తో పాటు పలువురు పాల్గొన్నారు. విద్యార్థుల ప్రయాణ భద్రతను మెరుగుపరచడానికి ఇలాంటి తనిఖీలు కొనసాగుతాయని అధికారులు తెలిపారు.
