దేశవ్యాప్తంగా మే 2న లక్షలాది మొబైల్ ఫోన్లలో ఒకేసారి పెద్ద సైరన్ శబ్దం వినిపించనుంది. అయితే, దీనిపై ప్రజలు ఆందోళన చెందాల్సిన అవసరం లేదని కేంద్ర ప్రభుత్వం స్పష్టం చేసింది. ఇది విపత్తు హెచ్చరిక వ్యవస్థ పనితీరును పరీక్షించేందుకు నిర్వహిస్తున్న ఒక మాక్ డ్రిల్ అని తెలిపింది.
భవిష్యత్తులో సంభవించే ప్రకృతి వైపరీత్యాలైన వరదలు, తుఫానులు, భూకంపాలు వంటి విపత్కర పరిస్థితుల్లో ప్రజలను సకాలంలో అప్రమత్తం చేసేందుకు 'సాచెట్' (SACHET) అనే నూతన వ్యవస్థను కేంద్ర ప్రభుత్వం అభివృద్ధి చేసింది. ఈ వ్యవస్థ సమర్థవంతంగా పనిచేస్తుందో లేదో తెలుసుకోవడానికి, టెలికమ్యూనికేషన్ శాఖ మరియు జాతీయ విపత్తు నిర్వహణ సంస్థ (NDMA) సంయుక్తంగా ఈ పరీక్షను నిర్వహిస్తున్నాయి.
పరీక్ష సమయంలో, మొబైల్ ఫోన్లలో ఒక సందేశంతో పాటు పెద్ద సైరన్ శబ్దం వినిపిస్తుంది. ఇది కేవలం ఒక 'టెస్ట్ అలర్ట్' మాత్రమేనని, దీనికి ఎటువంటి ప్రతిస్పందన అవసరం లేదని అధికారులు సూచించారు. అత్యవసర హెచ్చరికల వ్యవస్థ, కామన్ అలర్టింగ్ ప్రోటోకాల్ (CAP) ప్రమాణాల ఆధారంగా పనిచేస్తుంది. అంతర్జాతీయ టెలికమ్యూనికేషన్ యూనియన్ (ITU) సిఫార్సు చేసిన ఈ సాంకేతికత దేశంలోని 36 రాష్ట్రాలు మరియు కేంద్ర పాలిత ప్రాంతాలలో అమలులో ఉంది.
ఈ వ్యవస్థ వల్ల ఏదైనా ప్రమాదం పొంచి ఉన్నప్పుడు సెకన్ల వ్యవధిలో వేలాది మందికి సమాచారం చేరవేయడం సాధ్యమవుతుంది. వరదలు లేదా తుఫానులు వంటివి సంభవించే ముందు హెచ్చరికలు పంపడం ద్వారా ప్రాణ నష్టాన్ని తగ్గించవచ్చని భావిస్తున్నారు. ప్రమాదం ఉన్న ప్రాంతంలోని ఫోన్లకు మాత్రమే ఈ సందేశాలు వెళ్లేలా ఈ టెక్నాలజీని రూపొందించారు.
