కొమురం భీం కాలనీలో అంతర్జాతీయ శ్రామిక మహిళా దినోత్సవ సభ: హక్కుల సాధనకు పిలుపు

నిర్మల్‌లో ఆదివారం నిర్వహించిన కార్యక్రమంలో తుడుం దెబ్బ రాష్ట్ర, జిల్లా నాయకులు సభకు సంబంధించిన కరపత్రాలను విడుదల చేశారు. ఈ సభ మహిళలకు పూర్తి స్థాయిలో స్వేచ్ఛ, సమానత్వం, స్వయం పరిపాలన హక్కులు కల్పించాల్సిన ఆవశ్యకతను తెలియజేస్తుందని వారు తెలిపారు.

రాష్ట్ర వర్కింగ్ ప్రెసిడెంట్ గోడం గణేష్, రాష్ట్ర ఉపాధ్యక్షులు వెంకగారి భూమయ్య మాట్లాడుతూ, సమాజ అభివృద్ధిలో మహిళల పాత్ర కీలకమని, అయినప్పటికీ మహిళలపై అణచివేత, వరకట్న హత్యలు, భ్రూణహత్యలు, గృహహింస వంటి ఘటనలు ఆందోళనకరమని పేర్కొన్నారు. ఈ అన్యాయాలకు వ్యతిరేకంగా గళమెత్తేందుకు, మహిళా సాధికారతను బలోపేతం చేయడానికి ఈ సభ వేదిక కానుంది.

ఈ కార్యక్రమానికి మహిళలు, ప్రజాస్వామికవాదులు, మేధావులు, కార్మికులు, కర్షకులు, ఆదివాసీలు పెద్ద సంఖ్యలో హాజరై విజయవంతం చేయాలని నాయకులు విజ్ఞప్తి చేశారు.

ఈ కరపత్రాల విడుదల కార్యక్రమంలో జిల్లా అధ్యక్షులు సాకి లక్ష్మణ్, వర్కింగ్ ప్రెసిడెంట్ సుంచు శ్రీనివాస్, జిల్లా కార్యదర్శి తుడసం గోవర్ధన్, జిల్లా సంయుక్త కార్యదర్శి సురపు సాయన్న, మరియు ఇతర నాయకులు పాల్గొన్నారు.